తెలంగాణపై సెప్టెంబర్ ఆఖరు దాకా చూస్తాం: గండ్ర

By Pratap

Published: Thursday, September 1, 2011, 14:51 [IST]

హైదరాబాద్: తెలంగాణపై సెప్టెంబర్ నెలాఖరు వరకు వేచి చూస్తామని కాంగ్రెసు తెలంగాణ ప్రాంత శాసనసభ్యుడు గండ్ర వెంకటరమణా రెడ్డి చెప్పారు. ప్రభుత్వాన్ని కాపాడుకుంటూనే తెలంగాణ రాష్ట్రాన్ని సాధించుకుంటామని ఆయన గురువారం మీడియా ప్రతినిధులతో అన్నారు. తెలంగాణ రాష్ట్ర సాధన విషయంలో తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కాంగ్రెసు చిత్తశుద్ధిని శంకించడం సరి కాదని ఆయన అన్నారు. పదిహేను రోజుల్లో తెలంగాణపై కేంద్రం నుంచి ప్రకటన వస్తుందని తమ దీక్షా శిబిరం వద్ద చెప్పిన కెసిఆర్ ఇప్పుడు తమను విమర్శించడం సరి కాదని ఆయన అన్నారు.

సెప్టెంబర్ నెలాఖరు వరకు తెలంగాణపై సానుకూల ప్రకటన లేకపోతే తాము రాజీనామాలు చేస్తామని, రాజీనామాలకు తాము వెనకాడేది లేదని ఆయన అన్నారు. ప్రభుత్వాన్ని కాపాడుకుంటూనే తెలంగాణను సాధించుకోవాల్సిన బాధ్యత తమపై ఉందని ఆయన అన్నారు. వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గం శాసనసభ్యులకు ఉన్నపాటి చిత్తశుద్ధి కూడా కాంగ్రెసు తెలంగాణ శాసనసభ్యులకు లేదని కెసిఆర్ బుధవారం విమర్శించిన విషయం తెలిసిందే.

Published On September 1, 2011