తెలంగాణ టిడిపి సవాల్‌ను స్వీకరించిన హరీష్ రావు

By Pratap

Published: Friday, September 2, 2011, 11:13 [IST]

హైదరాబాద్: తెలంగాణ రాష్ట్రం ఏర్పడే వరకు ఎన్నికల్లో పోటీ చేయకూడదనే తెలంగాణ తెలుగుదేశం నాయకుల సవాల్‌ను స్వీకరించడానికి తెలంగాణ రాష్ట్ర సమితి (తెరాస) శాసనసభ్యుడు హరీష్ రావు సంసిద్ధత వ్యక్తం చేశారు. అయితే, అందుకు ఆయన షరతు పెట్టారు. తెలంగాణకు అనుకూలంగా 2009 తీసుకున్న నిర్ణయానికి కట్టుబడి ఉంటామని తెలుగుదేశం తెలంగాణ నాయకులు వారి అధ్యక్షుడు నారా చంద్రబాబు నాయుడితో ప్రకటన ఇప్పించాలని ఆయన డిమాండ్ చేశారు.

తాము తెలంగాణకు అనుకూలంగా ఉన్నామని చంద్రబాబుతో ప్రధాని డాక్టర్ మన్మోహన్ సింగ్‌కు లేఖ రాయించాలని కూడా ఆయన డిమాండ్ చేశారు. తెలంగాణ కోసం జెండాలు, ఎజెండాలను పక్కన పెట్టాల్సింది కాంగ్రెసు, తెలుగుదేశం పార్టీలేనని ఆయన అన్నారు. జెండాలను పక్కన పెట్టకపోతే ఆ రెండు పార్టీలను ప్రజలు పక్కన పెడతారని ఆయన అన్నారు. రేపు శనివారం జరిగే పార్టీ రాష్ట్ర కార్యవర్గ సమావేశంలో ఉద్యమ కార్యాచరణను రూపొందిస్తామని ఆయన చెప్పారు.

Published On September 2, 2011