అధిష్టానంతో తాడో పేడో: తెలంగాణపై కెకె మరో డెడ్ లైన్

By Srinivas

Published: Sunday, September 4, 2011, 13:01 [IST]

హైదరాబాద్: తెలంగాణ అంశంపై పార్టీ అధిష్టానానికి కాంగ్రెసు పార్టీ సీనియర్ నాయకుడు, రాజ్యసభ సభ్యుడు కేశవ రావు మరో డెడ్ లైన్ పెట్టారు. సెప్టెంబర్ 30వ తారీఖు లోగా కేంద్రం తెలంగాణపై తేల్చాలని డిమాండ్ చేశారు. లేదంటే అక్టోబరులో అధిష్టానంతో తాడో పేడో తేల్చుకుంటామని హెచ్చరించారు. ఈ నెల 17వ తేదీ లోపు తెలంగాణపై స్పష్టత వస్తుందని తాను భావిస్తున్నానన్నారు. కేంద్ర ప్రభుత్వం ప్రజాభిప్రాయానికి తల వంచాల్సిందేనన్నారు. నాలుగున్నర కోట్ల మంది తెలంగాణ ప్రజలు ప్రత్యేక రాష్ట్రాన్ని కోరుకుంటే ఎందుకు ఇవ్వకుంటా ఉంటారన్నారు. ఐక్యంగా ఉద్యమిస్తే 2011లోనే తెలంగాణ వచ్చి తీరుతుందన్నారు.

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు తిట్లను తాము దీవెనలుగానే భావిస్తామన్నారు. తెలంగాణ రాదని ఎవరూ నిరాశ చెందవద్దన్నారు. తెలంగాణ వాదులు పరస్పర దూషణలు మానుకోవాలని సూచించారు. తెలంగాణ కోసం కలిసి వచ్చే వారిని అందరూ కలుపుకొని పోవాలని సూచించారు. నవంబర్ 1వ తేదిన రాష్ట్ర అవతరణ దినోత్సవం ఉండదని తాను భావిస్తున్నానన్నారు. ఉద్యమకారులు సహనంగా ఉండాలన్నారు. రాజీనామాలపై తాము రాజీపడే ప్రసక్తి లేదన్నారు. టిడిపి అధినేత చంద్రబాబు నాయుడు తెలంగాణకు అనుకూలంగా లేఖ ఇస్తే తెలంగాణ వస్తుందన్నారు. తెలంగాణపై ఢిల్లీలో సోమవారం ఎంపీలం భేటీ అవుతున్నట్లు చెప్పారు.

Published On September 4, 2011