నాగం జనార్దన్ రెడ్డి కొత్త తెలంగాణ పార్టీ ఏర్పాటు

By Pratap

Published: Monday, September 5, 2011, 19:18 [IST]

హైదరాబాద్‌: తెలంగాణ రాష్ట్ర సాధన కోసం కొత్త పార్టీని ఏర్పాటు చేస్తానని తెలుగుదేశం పార్టీ నుంచి సస్పెండైన శాసనసభ్యుడు నాగం జనార్దన్ రెడ్డి చెప్పారు. అది పార్టీ గానీ ప్రత్యేక వేదిక గానీ కావచ్చునని కూడా ఆయన అన్నారు. తెలుగుదేశం పార్టీకి తనతో పాటు తన వర్గం శాసనసభ్యులు రెండు రోజుల్లో రాజీనామాలు చేస్తామని ఆయన సోమవారం మీడియా ప్రతినిధులతో చెప్పారు. తెలంగాణ రాష్ట్ర ఏర్పాటుకు తెలంగాణ ప్రజాప్రతినిధులే ఆడ్డంకిగా మారారని ఆయన విమర్శించారు. వారి చేత రాజీనామాలు చేయించడానికి ఉద్యమించాలని ఆయన పిలుపునిచ్చారు.

రాజీనామాలు చేయడం తమ రాజకీయ హక్కు అని, దాన్ని కాలరాస్తున్నారని ఆయన అన్నారు. శాసనమండలికి మాజీ ముఖ్యమంత్రి కె. రేశయ్య చేసిన రాజీనామాను నిమిషాల్లో మండలి చైర్మన్ ఆమోదించారని, తమ రాజీనామాలను మాత్రం స్పీకర్ ఆమోదించడం లేదని ఆయన అన్నారు. తమ రాజీనామాలను ఆమోదించకపోతే తెలంగాణ వ్యాప్తంగా ప్రజాస్వామ్య పరిరక్షణ ఉద్యమం చేపట్టవలసి వస్తుందని ఆయన అన్నారు.

Published On September 5, 2011