తప్పు లేకుంటే కాళ్లెందుకు పట్టుకోవాలి?: జగన్‌పై నారాయణ

By Srinivas

Published: Tuesday, September 6, 2011, 12:53 [IST]

రాజమండ్రి: రాజమండ్రి: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఏ తప్పు చేయకపోతే ఢిల్లీ వెళ్లి జాతీయ పార్టీ నేతల కాళ్లు పట్టుకోవాల్సిన అవసరం ఏముందని సిపిఐ రాష్ట్ర కార్యదర్సి నారాయణ మంగళవారం తూర్పు గోదావరి జిల్లాలో అన్నారు. జగన్ సిబిఐ విచారణకు సహకరించి తన నిజాయితీ నిరూపించుకోవాలని డిమాండ్ చేశారు. రాష్ట్రంలో మైనింగ్ మాఫియాకు ఆధ్యుడు దివంగత ముఖ్యమంత్రి వైయస్ రాజశేఖర రెడ్డియే అన్నారు. వైయస్ హయాంలో జరిగిన భూకేటాయింపులన్నింటినీ ప్రభుత్వం వెంటనే నిలుపుదల చేయాలని డిమాండ్ చేశారు. ప్రస్తుతం కేంద్రంలో, రాష్ట్రంలో కాంగ్రెసు పార్టీయే అధికారంలో ఉందన్నారు.

తెలుగుదేశం పార్టీ అధినేత నారా చంద్రబాబు నాయుడుపై అవినీతి ఆరోపణలు వచ్చినప్పుడు విచారణ చేసుకోవచ్చు కదా అన్నారు. విచారణ వద్దని తామేమీ అనడం లేదన్నారు. రాష్ట్రంలో మైనింగ్ మాఫియాకు పాల్పడ్డ వారిని వెంటనే అరెస్టు చేయాలన్నారు. వంతాడ అక్రమ మైనింగ్ పైన నిగ్గు తేల్చాలన్నారు. మైనింగ్ మాఫియా గుట్టు రట్టు చేయాల్సిందేనన్నారు. రాష్ట్రంలోని అక్రమ మైనింగ్‌పై సిబిఐ ఏనాడో బయట పెట్టిందన్నారు. రాజకీయ అవినీతిపై తొమ్మిది వామపక్షాలతో కలిసి ప్రత్యక్ష పోరుకు కార్యాచరణ రూపొందిస్తామని చెప్పారు.

Published On September 6, 2011