జైలుకెళితే దేవుడే చూసుకుంటాడు: వైయస్ జగన్

By Srinivas

Published: Tuesday, September 6, 2011, 19:39 [IST]

న్యూఢిల్లీ: తాను జైలుకు వెళ్లాల్సిన పరిస్థితి వస్తే ఆ దేవుడే చూసుకుంటాడని వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఓ నేషనల్ ఛానల్‌కు ఇచ్చిన ఇంటర్వ్యూలో మంగళవారం అన్నారు. తాను తిరిగి ఎట్టి పరిస్థితుల్లోనూ కాంగ్రెసులో చేరేది లేదన్నారు. రాష్ట్రంలో కాంగ్రెసు పార్టీ బలోపేతం కోసం తన తండ్రి, దివంగత ముఖ్యమంత్రి వైయస్ రాజశేఖర రెడ్డి ముప్పయ్యేళ్లు కృషి చేశారన్నారు. అలాంటి కాంగ్రెసు ఇప్పుడు వైయస్‌ను దోషిగా చేసే ప్రయత్నం చేస్తోందని ఆరోపించారు. తాను ఎట్టి పరిస్థితుల్లోనూ భారతీయ జనతా పార్టీతో పొత్తు పెట్టుకునేది లేదన్నారు. కేంద్రంలో బిజెపియేతర పార్టీలు అధికారంలోకి వస్తే రాష్ట్ర ప్రయోజనాలను దృష్టిలో పెట్టుకొని మద్దతు ఇస్తానని చెప్పారు.

ఎన్నికలకు ముందు గానీ ఎన్నికల తర్వాత గానీ బిజెపితో కలిసే ప్రసక్తి లేదన్నారు. తాను రాత్రికి రాత్రే కోటీశ్వరున్ని కాలేదన్నారు. కర్నాటక మాజీ మంత్రి గాలి జనార్దన్ రెడ్డితో తనకు, తన తండ్రికి ఎలాంటి సంబంధం లేదన్నారు. తన తండ్రి ఎన్నికల్లో గాలికి వ్యతిరేకంగా ప్రచారం చేశారన్నారు. గాలికి మైనింగ్ అనుమతులు పొడిగించింది తెలుగుదేశం పార్టీ అధినేత నారా చంద్రబాబు నాయుడే అన్నారు. చంద్రబాబు ప్రవేశ పెట్టిన వాటినే తన తండ్రి అమలు పరిచారని చెప్పారు. అలాంటప్పుడు తన తండ్రిని మాత్రమే తప్పు పట్టడం ఎంత వరకు సమంజసమన్నారు.

Published On September 6, 2011