వైయస్ జగన్ అరెస్టయ్యే అవకాశం లేదు: అంబటి

By Srinivas

Published: Wednesday, September 7, 2011, 16:12 [IST]

హైదరాబాద్: కడప పార్లమెంటు సభ్యుడు వైయస్ జగన్మోహన్ రెడ్డి ఎట్టి పరిస్థితుల్లోనూ అరెస్టయ్యే అవకాశమే లేదని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు బుధవారం అన్నారు. జగన్ దేనికీ భయపడరన్నారు. జగన్‌పై కొందరు ఉద్దేశ్య పూర్వకంగా విష ప్రచారం చేస్తున్నారని ధ్వజమెత్తారు. కేంద్రంలో కాంగ్రెసు రోజు రోజుకు క్షీణిస్తోందన్నారు. కాంగ్రెసుతో జగన్ కలిసే పరిస్థితి లేదన్నారు. తాను కాంగ్రెసుతో గానీ, భారతీయ జనతా పార్టీలో గాని కలిసే ప్రసక్తి లేదని జగన్ ఇప్పటికే స్పష్టం చేశారన్నారు. జాతీయ స్థాయిలో రాష్ట్ర ప్రయోజనాలను అనుసరించి వైయస్సార్ కాంగ్రెసు పార్టీ వ్యవహరిస్తుందన్నారు. జాతీయ స్థాయిలో కూడా తమ పార్టీదే కీలక పాత్ర ఉంటుందన్నారు. ఎన్ని విమర్శలు వచ్చినా అంతిమ విజయం మాత్రం జగన్ పార్టీదే అన్నారు.

కాంగ్రెసు పార్టీ సీనియర్ నేత, రాజ్యసభ సభ్యుడు వి హనుమంత రావుపై శాసనమండలి సభ్యురాలు పుల్లా పద్మావతి తీవ్రస్థాయిలో ధ్వజమెత్తారు. వార్డు మెంబర్‌గా కూడా గెలవలేని విహెచ్ జగన్, పులివెందుల శాసనసభ్యురాలు వైయస్ విజయమ్మను విమర్శించే నైతిక హక్కు లేదన్నారు. తెలంగాణ ప్రాంత పార్లమెంటు సభ్యుడిగా ఉండి ప్రకాశం జిల్లాలో ఎంపీ లాడ్స్ నిధులు ఖర్చు పెడుతున్నారని విహెచ్‌ను విమర్శించారు.

Published On September 7, 2011