హరీష్ రావుపై ధ్వజమెత్తిన ఎర్రబెల్లి దయాకర రావు

By Pratap

Published: Thursday, September 8, 2011, 16:31 [IST]

హైదరాబాద్: తమపై విమర్శలు చేసిన తెలంగాణ రాష్ట్ర సమితి (తెరాస) శాసనసభ్యుడు హరీష్ రావుపై తెలుగుదేశం తెలంగాణ ఫోరం కన్వీనర్ ఎర్రబెల్లి దయాకర రావు ధ్వజమెత్తారు. తెలంగాణపై చిత్తశుద్ధి లేకుండా మాట్లాడవద్దని ఆయన గురువారం మీడియా ప్రతినిధుల సమావేశంలో తెరాసకు సూచించారు. బాన్సువాడ ఉప ఎన్నికలో నామినేషన్లు వేయకుండా పార్టీలు తెలంగాణపై చిత్తశుద్ధి చాటుకోవాలని ఆయన పిలుపునిచ్చారు. తెలంగాణపై తమ వైఖరి స్పష్టంగా ఉందని ఆయన చెప్పారు. ఎవరో చెప్తే తాము రాజీనామాలు చేయబోమని ఆయన అన్నారు. రాజీనామాలు చేయాలని చెప్పడానికి హరీష్ రావు ఎవరని ఆయన ప్రశ్నించారు. తెలంగాణ పేరు చెప్పుకుని తెరాస అధ్యక్షుడు కెసిఆర్ కుటుంబ సభ్యులు పదవులు పంచుకుంటున్నారని ఆయన విమర్శించారు.

సిద్దిపేట తెలంగాణ రాష్ట్ర సమితి శాసనసభ్యుడు హరీష్ రావు ఓ బచ్చా అని తెలుగుదేశం పార్టీ శాసనసభ్యుడు కొత్తకోట దయాకర్ రెడ్డి గురువారం విమర్శించారు. ఉద్యమం పేరుతో అదిలాబాద్ జిల్లాలో బినామీ పేరుతో రూ.400 కోట్ల రోడ్డు కాంట్రాక్టు హరీష్ రావు చేపట్ట లేదా అని ప్రశ్నించారు. రాజ్యాంగ సంక్షోభం ద్వారానే తెలంగాణ సాధ్యమని తెలుగుదేశం ఎప్పటి నుండో చెబుతోందన్నారు. రాజీనామాలు చేస్తే పోటీకి దూరంగా ఉంటామని తెలుగుదేశం పార్టీ ఎప్పుడో ప్రకటించిందన్నారు. తెలంగాణ కోసం అంటూ రాజీనామా చేసిన బాన్సువాడ మాజీ శాసనసభ్యుడు పోచారం శ్రీనివాస్ రెడ్డి పోటీలో నిలవకుండా ఆదర్శంగా నిలవాలని సూచించారు.

Published On September 8, 2011