వైయస్ జగన్‌పై ఆయన ఎమ్మెల్యేలకు నమ్మకం లేకేనా?

By Srinivas

Published: Sunday, September 11, 2011, 13:50 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం శాసనసభ్యులు, నేతలు జగన్ అవినీతి, అక్రమాలకు పాల్పడలేదని నమ్మడం లేదా అంటే అవుననే అభిప్రాయం పలువురి నుండి వ్యక్తమవుతోంది! వారి చర్యలు, వ్యాఖ్యలు జగన్ నీతిమంతుడని వారు విశ్వసించినట్లుగా కనిపించడం లేదని పలువురు అభిప్రాయపడుతున్నారు! జగన్ తన తండ్రి, దివంగత ముఖ్యమంత్రి వైయస్ రాజశేఖర రెడ్డి హయాంలో అక్రమాలకు పాల్పడలేదని గట్టిగా విశ్వసిస్తే ఇరవయ్యారు మంది శాసనసభ్యులు కేవలం ఎఫ్ఐఆర్‌లో వైయస్ పేరు ఉన్నందుకు మాత్రమే రాజీనామా చేస్తున్నట్టు ఎందుకు ప్రకటిస్తారంటున్నారు.

జగన్ అవినీతికి పాల్పడలేదనుకుంటే రాష్ట్రానికి మంచి పాలన అందించి పేదలకు పలు సంక్షేమ పథకాలు ప్రవేశ పెట్టిన వైయస్ తనయుడు జగన్‌పై కాంగ్రెసు అన్యాయంగా కేసులు పెట్టి వేధిస్తుందని వారు రాజీనామాలు ఎందుకు చేయలేదని ప్రశ్నిస్తున్నారు. అంతేకాకుండా వైయస్ పైన కేసులు కొత్త కాదని అలాంటప్పుడు జగన్ వర్గం ఎమ్మెల్యేలు రాజీనామాలు చేయడమేమిటని తెలుగుదేశం పార్టీ అప్పుడే ప్రశ్నించింది. వైయస్సార్సీ పార్టీ నేతలు అంబటి రాంబాబు తదితరులు కూడా అవినీతి జరిగితే అందులో మంత్రివర్గం పాత్ర ఉంటుందని, సిబిఐ దర్యాఫ్తు కాంగ్రెసు కుట్ర అని మాత్రమే అంటున్నారని కానీ జగన్‌పై అవినీతి ఆరోపణలు మాత్రం గట్టిగా ఖండించక పోవడాన్ని పలువురు ప్రశ్నిస్తున్నారు.

Published On September 11, 2011