జైలుకెళ్లేందుకు సిద్ధంగా ఉండు: జగన్‌కు దేవినేని

By Srinivas

Published: Monday, September 12, 2011, 15:02 [IST]

హైదరాబాద్: వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డిపై తెలుగుదేశం పార్టీ నేతలు వేరు వేరుగా సోమవారం విరుచుకు పడ్డారు. జగన్ ఓదార్పు యాత్ర కాకుండా జైలు యాత్ర చేయాలని తెలుగుదేశం పార్టీ సీనియర్ శాసనసభ్యుడు దేవినేని ఉమా మహేశ్వర రావు విజయవాడలో అన్నారు. సిబిఐ దాడుల నేపథ్యంలో అరెస్టు నుండి తప్పించుకోవడానికే జగన్ ప్రస్తుతం ఓదార్పుయాత్ర చేపడుతున్నారన్నారు. జగన్ జైలుకు వెళ్లేందుకు సిద్ధంగా ఉండాలన్నారు. ఓవైపు కృష్ణా జిల్లాలో ప్రజలు ఇబ్బందులు పడుతుంటే ఓదార్పు పేరుతో వారిని మరింత ఇబ్బందులకు గురి చేస్తున్నారన్నారు.

వైయస్ జగన్‌కు తమ పార్టీ అధ్యక్షుడు నారా చంద్రబాబు నాయుడును విమర్శించే నైతిక హక్కు లేదని ఖమ్మం పార్లమెంటు సభ్యుడు నామా నాగేశ్వర రావు అన్నారు. ప్రపంచ వ్యాప్తంగా అవినీతిపరులకు ఓటింగ్ పెడితే జగన్ మొదటి స్థానంలో ఉంటారన్నారు. కర్నాటక మాజీ మంత్రి గాలి జనార్ధన్ రెడ్డి ఉరిశిక్ష వేయాలన్నారు. రాష్ట్ర కాంగ్రెసు నేతలు ప్రజా సేవ చేయకుండా ఏం తింటున్నారో ఏడేళ్లుగా టిడిపి చెబుతూనే ఉందని మరో ఎమ్మెల్యే పయ్యావుల కేశవ్ అన్నారు. జగన్ కాంగ్రెసులో ఉన్నప్పుడు రైతులకు ఏం చేశారో చెప్పాలన్నారు. 33 మంది ఎంపీలలో ఒకడిగా ఉన్నప్పుడు రైతులకు ఏం చేశారో చెప్పాలన్నారు. పార్టీ పెట్టిన తర్వాత ప్రశ్నలు వేయడం కాదన్నారు.

Published On September 12, 2011