కెసిఆర్, కోదండరామ్ హీరోలుగా సినిమా: టిజి వెంకటేష్

By Srinivas

Published: Tuesday, September 13, 2011, 12:44 [IST]

న్యూఢిల్లీ: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ కోదండరాంలను హీరోలుగా పెట్టి సినిమా తీస్తే బావుంటుందని మంత్రి టిజి వెంకటేష్ మంగళవారం న్యూఢిల్లీలో అభిప్రాయపడ్డారు. తెలంగాణపై కెసిఆర్, కోదండరాంల నటన చాలా బావుందని అలాగే తెలంగాణ ప్రాంతం నుండి సినిమా ఇండస్ట్రీలో హీరోలు తక్కువగా ఉన్నారు కాబట్టి వారిని హీరోలుగా పెట్టి సినిమా తీస్తే చాలా మంచిదన్నారు. కెసిఆర్ తన మాటలు అదుపులో పెట్టుకోవాలని సూచించారు. కెసిఆర్ తెలుగు సంస్కృతిని దెబ్బతీసేలా మాట్లాడుతున్నారని విమర్శించారు. కెసిఆర్ తన ఆవేశాన్ని అదుపులో పెట్టుకోవాలన్నారు. విభజన జరిగితే రాయలసీమ వాసులు ఎక్కడకు పోవాలని ప్రశ్నించారు.

సకల జనుల సమ్మె అంటున్న కోదండరాం తన ప్రభుత్వ ఉద్యోగానికి రాజీనామా చేయకుండా ఉద్యమం చేయడమేమిటని ప్రశ్నిస్తున్నారు. ఉద్యమం, సమ్మె పేరుతో విద్యార్థులు, చిన్న వ్యాపారులను బలి చేస్తున్నారని విమర్శించారు. కెసిఆర్, కోదండరాంలు తమ పద్ధతులు మార్చుకోవాలన్నారు. మీరు చెయ్యెత్తితే రాయలసీమ వాళ్లు ఏం చేస్తారో తెలియదన్నారు. తాను తెలంగాణ నేతలపై అమానుష భాష మాట్లాడలేదన్నారు.

Published On September 13, 2011