తెలంగాణ ప్రక్రియ ప్రారంభం, తగ్గండి: దానం హెచ్చరిక

హైదరాబాద్: తెలంగాణ ఉద్యోగులు వెంటనే సకల జనుల సమ్మెను ఉపసంహరించుకోవాలని కార్మిక శాఖ మంత్రి దానం నాగేందర్ బుధవారం హెచ్చరించారు. సమ్మె వల్ల తెలంగాణలోని సామాన్య ప్రజలకే నష్టమన్నారు. సంక్షేమ పథకాలకు సైతం ఆటంకం కలుగుతోందన్నారు. ఉద్యోగులు ప్రభుత్వంలో భాగస్వాములని, ఔట్ సోర్సింగ్ ఉద్యోగులు విధుల్లో హాజరు కాకుంటే చర్యలు తప్పవన్నారు. ధర్నాలు, ఆందోళనలతో తెలంగాణ రాదన్నారు. 108 ఉద్యోగులు వెంటనే ఆందోళన విరమించాలని కాంట్రాక్టు ఏజెన్సీలు సైతం సమ్మె కొనసాగింపుపై పునరాలోచన చేయాలన్నారు.

తెలంగాణ ప్రక్రియ ప్రారంభమైందని త్వరలో పరిష్కారం లభిస్తుందని ముఖ్యమంత్రి కిరణ్ కుమార్ రెడ్డి ఇప్పటికే చెప్పారని గుర్తు చేశారు. సమ్మె వల్ల తెలంగాణ ప్రజలు ఆవేదన చెందుతున్నారన్నారు. పిల్లల భవిష్యత్తు నాశనమైపోతుందని ముఖ్యమంత్రి ఆవేదన వ్యక్తం చేస్తున్నారన్నారు. కాగా రిజిస్ట్రేషన్ శాఖను సైతం ఎస్మా పరిధిలోకి తీసుకు వచ్చినట్లుగా తెలుస్తోంది. మరోవైపు ఎస్మాలకు భయపడేది లేదని తెలంగాణ ఉద్యోగ సంఘాలు ప్రభుత్వం హెచ్చరికలను బేఖాతరు చేస్తున్నాయి.

English summary

Minister Danam Nagender warned today Telangana employees to withdraw Sakala Janula strike.