కిరణ్ కుమార్ రెడ్డి చేతిలో శంకరరావుకు అవమానం

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిపై న్యాయపోరాటానికి దిగిన మంత్రి పి. శంకరరావును ముఖ్యమంత్రి కిరణ్ కుమార్ రెడ్డి అవమానించినట్లు చెబుతున్నారు. ముఖ్యమంత్రి తీరు పట్ల శంకర రావు తీవ్ర అసంతృప్తితో ఉన్నట్లు సమాచారం జగన్‌ను ఢీకొనడం ద్వారా పార్టీ ప్రతిష్ఠ పెంచేందుకు తాను చేస్తున్న ప్రయత్నాలకు ప్రభుత్వం నుంచి కనీస సహకారం అందడం లేదని ఆయన తన సన్నిహితుల వద్ద అంటున్నట్లు తెలుస్తోంది. తాజాగా ముఖ్యమంత్రి కిరణ్‌కుమార్‌రెడ్డి జన్మ దినం సందర్భంగా ఆయనకు ఫోన్‌లోనే శుభకాంక్షలు చెప్పేందుకు శంకర్‌రావు చేసిన ప్రయత్నం ఫలించలేదని తెలుస్తోంది.

కార్యదర్శి జవహర్‌రెడ్డి, సీఎం క్యాంపు కార్యాలయానికి ఫోన్‌ చేసి తాను సీఎంకు జన్మదిన శుభాకాంక్షలు చెప్పాలని కోరినా, అర్ధరాత్రి వరకూ కనెక్షన్‌ ఇవ్వకుండా సార్‌ బిజీగా ఉన్నారంటూ వచ్చిన సమాచారం వచ్చినట్లు తెలుస్తోంది. కాంగ్రెసును దెబ్బ తీయడానికి ప్రయత్నిస్తున్న జగన్‌పై తాను చేసిన పోరాటాన్ని కూడా గుర్తించడం లేదని శంకరరావు అంటున్నట్లు తెలుస్తోంది. తనను చంపేస్తామని బెదిరింపు ఫోన్లు వస్తున్నా లెక్కచేయడం లేదని సోనియాగాంధీని, పార్టీని జగన్‌ విమర్శిస్తుంటే ఎదురుదాడి చేయమని సూచించానని, అది తాను చేసిన తప్పా అని ఆయన అంటున్నట్లు తెలుస్తోంది. తాను దళితుడిని కాబట్టే ముఖ్యమంత్రి తనను పట్టించుకోవడం లేదని ఆయన ఆవేదన వ్యక్తం చేస్తున్నట్లు తెలుస్తోంది.

English summary

It is said that Minister P Shankar Rao was insulted by CM Kiran Kumar Reddy.