రెండో రోజు తెలంగాణ సమ్మె, సినిమా హాళ్లు మూత

హైదరాబాద్: ప్రత్యేక తెలంగాణ రాష్ట్ర సాధన కోసం తెలంగాణ రాజకీయ జేఏసీ, ఉద్యోగ సంఘాలు పిలుపు మేరకు సకల జనుల సమ్మె రెండో రోజైన బుధవారం కొనసాగుతోంది. సమ్మెలో భాగంగా హైదరాబాద్‌లో ర్యాలీలు, సభలు నిర్వహించారు. తెలంగాణ వ్యాప్తంగా సకల జనుల సమ్మెకు మద్దతుగా సుమారు 450 సినిమా హాళ్లు మూతపడినట్లు సమాచారం. ఇందిరాపార్క్ వద్ద తెలంగాణ ఎలక్ట్రానిక్ మీడియా నిరాహార దీక్ష చేపట్టారు. ఈ దీక్షకు కాంగ్రెసు నాయకుడు కె. కేశవ రావు, తెలంగాణ రాష్ట్ర సమితి నాయకుడు హరీష్ రావు హాజరయ్యారు.

హైదరాబాదులోని ఉస్మానియా విశ్వవిద్యాలయంలో టీచింగ్, నాన్‌టీచింగ్ ఉద్యోగులు ర్యాలీ చేపట్టారు. విద్యుత్ సౌధ ఎదుట ఉద్యోగులు మహాధర్నా చేశారు. సమ్మెకు మద్దతుగా నేడు, రేపు థియేటర్లు బంద్ పాటిస్తున్నాయి. మరోవైపు సింగరేణిలోనూ రెండో రోజు సకల జనుల సమ్మె కొనసాగుతోంది. తెలంగాణ రాష్ట్రం వచ్చేంతవరకు సమ్మెను కొనసాగిస్తామని సచివాలయం జెఎసి ప్రకటించింది. గ్రేటర్ హైదరాబాద్ పరిధిలో 160 సినిమా హాళ్ళు స్వచ్ఛందంగా మూతపడ్డాయి. కరీంనగర్ జిల్లా రామగుండం రీజియన్‌లో రెండో రోజు సమ్మె కొనసాగుతోంది. ఎమర్జెన్సీ కార్మికులు మినహా మిగతా కార్మికులు గనుల వైపు చూడటం లేదు.

English summary

Telangana strike continued second day on Wednesday. As a part of strike cinema halls were closed in Telangana region.