నా భార్య కూరగాయలు, పాలు అమ్ముకుంటోంది: బాబు

By Pratap

Published: Thursday, September 15, 2011, 8:48 [IST]

ఒంగోలు: తన భార్య భువనేశ్వరి పాలు, కూరగాయులు అమ్ముకుంటోందని, తానే కాదు తన కుటుంబ సభ్యులెవరూ ఏనాడూ అవినీతికి పాల్పడలేదని తెలుగుదేశం పార్టీ అధ్యక్షుడు నారా చంద్రబాబు నాయుడు అన్నారు. తాను సాధారణ రైతు కుటుంబం నుంచి వచ్చినవాడినని, తనపై ప్రజలు చూపుతున్న ఆదరాభిమానులు చూసి ఓర్వలేక తనపై కాంగ్రెసు తప్పుడు ఆరోపణలు చేస్తోందని ఆయన అన్నారు. తన వద్ద అక్రమాస్తులు లేవని, ఉన్నట్లు చూపితే వాటిని వారికే ఇచ్చేస్తానని ఆయన అన్నారు. ఒంగోలులో ఆయన బుధవారం పార్టీ జిల్లా కమిటీ సమావేశంలో ప్రసంగించారు. విద్యార్థులతో ముఖాముఖి నిర్వహించారు.

గాలి జనార్దన్ రెడ్డిపై ఆరేళ్లుగా పోరాడుతున్నామని, వైయస్ రాజశేఖర రెడ్డి గాలి జనార్దన్ రెడ్డికి వత్తాసు పలికారని ఆయన అన్నారు. మాజీ మంత్రి బాలినేని శ్రీనివాస రెడ్డిని గ్రామీణులే తరిమి కొడతారని ఆయన అన్నారు. అవినీతి సొమ్ముతో మీడియాను స్థాపించిన వైయస్సార్ కాంగ్రెసు పార్టీ అధ్యక్షుడు వైయస్ జగన్ తమను లక్ష్యం చేసుకున్నారని ఆయన విమర్శించారు. తాము రాజా ఆఫ్ కరప్షన్ పుస్తకం ప్రచురించి పంచినప్పుడే కాంగ్రెసు అధిష్టానం చర్యలు తీసుకుని ఉంటే ఈ పరిస్థితి వచ్చి ఉండేది కాదని ఆయన అన్నారు.

Published On September 15, 2011