కక్షగా చెప్పడం సరికాదు: నారాయణ, సమైక్యాంధ్ర సెగ

By Srinivas

Published: Thursday, September 15, 2011, 11:24 [IST]

హైదరాబాద్: రాజకీయ నాయకులపై వచ్చే అవినీతి ఆరోపణలు కక్ష సాధింపు చర్యలుగా పేర్కొనడం సరికాదని సిపిఐ రాష్ట్ర కార్యదర్శి నారాయణ గురువారం గుంటూరు జిల్లాలో అన్నారు. గుంటూరు జిల్లాలో అవినీతికి వ్యతిరేకంగా ఆయన పాదయాత్ర ప్రారంభించారు. ఈ సందర్భంగా ఆయన మాట్లాడారు. రాజకీయ నాయకులు అవినీతికి పాల్పడకుంటే బంగారు కుర్చీలు ఎలా వస్తాయన్నారు. రాజకీయ నాయకులు తమపై వచ్చిన అవినీతి ఆరోపణలు కక్ష సాధింపు అని చెప్పడం సరికాదన్నారు. అవినీతి వ్యతిరేక ఉద్యమానికి సిపిఐ మద్దతుగా నిలుస్తుందన్నారు. రాజకీయాల్లో అవినీతి చీడ క్యాన్సర్‌లా వ్యాపించిందన్నారు. అవినీతిపై ప్రజలను చైతన్యపర్చాలన్నారు.

సకల జనుల సమ్మె రాజకీయంగా ఏర్పడిందన్నారు. దానికి రాజకీయంగానే పరిష్కారం లభిస్తుందన్నారు. పార్లమెంటు సభ్యులు పలువురు రెండు నాల్కల ధోరణితో వ్యవహరిస్తున్నారన్నారు. అలాంటి వారిని బట్టలూడదీసి కొట్టాలని ధ్వజమెత్తారు. కాగా ప్రత్యేక తెలంగాణకు మద్దతు పలుకుతున్న నారాయణను సమైక్యాంధ్ర జెఏసి అడ్డుకునే ప్రయత్నాలు చేసింది. పోలీసులు కల్పించుకొని వారిని సముదాయించే ప్రయత్నాలు చేశారు. అయితే వారు వినకపోవడంతో పోలీసులు అదుపులోకి తీసుకున్నారు.

Published On September 15, 2011