గాలితో నాకు ఎలాంటి సంబంధం లేదు: రాజగోపాల్

By Srinivas

Published: Thursday, September 15, 2011, 10:25 [IST]

హైదరాబాద్: కర్నాటక మాజీ మంత్రి, కర్నాటక భారతీయ జనతా పార్టీ సీనియర్ నేత గాలి జనార్ధన్ రెడ్డితో తనకు ఎలాంటి సంబంధాలు లేవని గనుల శాఖ మాజీ ఎండి రాజగోపాల్ గురువారం చెప్పారు. సిబిఐ అధికారులు తనను విచారించారని వాళ్లకు కావాల్సిన సమాచారాన్ని అందించానని చెప్పారు. పలువురు కేంద్ర మంత్రులు, రాష్ట్ర మంత్రులతో ఆయనకు సంబంధాలు ఉన్నాయన్నారు. గాలిని ప్రభుత్వమే విఐపిలా చూస్తోందన్నారు. సిబిఐ విచారణ ఎదుర్కొంటున్నందుకు తాను చాలా ఆవేదన చెందుతున్నానన్నారు. తాను పదవిలో ఉండగా సమర్థవంతంగా పని చేసి లాభాలు తీసుకు వచ్చానన్నారు.

కాగా బుధవారం రాజగోపాల్ ఇంట్లో సోదాలు నిర్వహించిన సిబిఐ అధికారులు వరుసగా రెండో రోజు కూడా సోదాలు చేస్తున్నారు. సుమారు ఐదు గంటల పాటు సోదాలు చేసిన అధికారులు పలు కీలక పత్రాలు స్వాధీనం చేసుకున్నారు. ఆయన ఇంట్లో సాయంత్రం నుండి రాత్రి పదిగంటల వరకు సోదాలు నిర్వహించారు. గాలి జనార్ధన్ రెడ్డికి సహకరించిన వైనంపై ప్రశ్నించినట్లుగా తెలుస్తోంది. మరికొందరు అధికారులు శ్రీలక్ష్మి, జయకుమార్ ఇళ్లలోనూ సోదాలు చేసినట్లుగా తెలుస్తోంది. కాగా గురువారం కూడా ఎమ్మార్, వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డి ఆస్తుల కేసులో మరికొందరు సిబిఐ అధికారుల ముందు హాజరవనున్నారు.

Published On September 15, 2011