బాబు ఇంట్లో నారా బ్రాహ్మణిని విచారించిన సిబిఐ

By Pratap

Published: Friday, September 16, 2011, 13:29 [IST]

హైదరాబాద్: ఎమ్మార్ ప్రాపర్టీస్ కేసులో సిబిఐ అధికారులు శుక్రవారం తెలుగుదేశం పార్టీ అధ్యక్షుడు నారా చంద్రబాబు నాయుడు నివాసానికి వచ్చారు. ఆయన కోడలు, హీరో బాలకృష్ణ కూతురు నారా బ్రాహ్మణిని విచారించేందుకు వచ్చారు. ఎమ్మార్ ప్రాపర్టీస్‌లో విల్లాలు కొన్నవారందరినీ విచారిస్తున్న క్రమంలో సిబిఐ అధికారులు నారా బ్రాహ్మణిని కూడా విచారించారు.

సిబిఐ అధికారులు బ్రాహ్మణి వాంగ్మూలాన్ని రికార్డు చేసుకున్నట్లు వార్తలు వచ్చాయి. నారా బ్రాహ్మణి పేరు మీద ఎమ్మార్ ప్రాపర్టీస్‌లో రెండు విల్లాలు ఉన్నాయి. వాటిని తన కుమారుడు నారా లోకేష్‌ను పెళ్లి చేసుకోక ముందు బాలకృష్ణ కొనుగోలు చేసి బ్రాహ్మణికి ఇచ్చారని చంద్రబాబు గతంలో చెప్పారు. చంద్రబాబు ఇంటికి వచ్చిన సిబిఐ అధికారులు మీడియా ప్రతినిధుల కంట పడకుండా సిబిఐ అధికారులు వెళ్లిపోయారు. అక్కడ ఉన్న ఓ తెలుగుదేశం నాయకుడు మీడియా ప్రతినిధులతో ముచ్చట్లు పెడుతూ మీడియా కళ్లు సిబిఐ అధికారుల మీదికి వెళ్లకుండా జాగ్రత్త పడినట్లు చెబుతున్నారు.

Published On September 16, 2011