జగన్ జైలుకు వెళ్లడం ఖాయం: బాబు జోస్యం

By Pratap

Published: Friday, September 16, 2011, 20:50 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ జైలుకు వెళ్లడం ఖాయమని తెలుగుదేశం పార్టీ అధ్యక్షుడు నారా చంద్రబాబు నాయుడు జోస్యం చెప్పారు. పార్టీ వర్క్‌షాపులో ఆయన శుక్రవారం మాట్లాడారు. జగన్‌కు చెందిన వైయస్సార్ కాంగ్రెసు గాలి పార్టీ అని, దానికి మనుగడ లేదని ఆయన అన్నారు. జగన్‌తో పాటు మరి కొంత మంది జైలుకు క్యూ కడతారని ఆయన అన్నారు. వైయస్సార్ కాంగ్రెసు పార్టీ కూడా చిరంజీవి నాయకత్వంలోని ప్రజారాజ్యం పార్టీ వంటిదేనని ఆయన వ్యాఖ్యానించారు.

కర్ణాటక మాజీ మంత్రి గాలి జనార్దన్ రెడ్డిపై తాము చేస్తున్న ఆరోపణలు నిజమై ఈ రోజు జైలులో ఉన్నాడని, వైయస్ జగన్ కూడా అలాగే జైలు పాలవుతాడని ఆయన అన్నారు. జగన్ పార్టీ నుంచి నాయకులందరూ జారిపోతారని ఆయన అన్నారు. జిల్లాల్లోని వైయస్ జగన్ ఆస్తుల వివరాలకు తనకు అందించాలని ఆయన పార్టీ నాయకులకు సూచించారు. వామపక్షాలతో పొత్తు ఉండాల్సిందేనని ఆయన స్పష్టం చేశారు. అవినీతిపై తాను త్వరలో ప్రజాచైతన్య యాత్రలు నిర్వహిస్తానని ఆయన చెప్పారు.

Published On September 16, 2011