గాలి కస్టడి పొడిగింపు కోరే యోచనలో సిబిఐ

By Srinivas

Published: Sunday, September 18, 2011, 12:05 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్దన్ రెడ్డి, ఓబుళాపురం మైనింగ్ కార్పొరేషన్ ఎండి శ్రీనివాస్ రెడ్డి కస్టడి సోమవారంతో ముగుస్తుండటంతో వారి కస్టడి పెంపుకోసం సిబిఐ అధికారులు కోర్టును కోరే అవకాశాలు కనిపిస్తున్నాయి. ఇటీవల గాలి జనార్దన్ రెడ్డిని, శ్రీనివాస్ రెడ్డిని సిబిఐ కస్టడీకి కోర్టు అప్పగించిన విషయం తెలిసిందే. కోర్టు వారిని కేవలం వారం రోజులు మాత్రమే సిబిఐ కస్టడీకి అప్పగించింది. అయితే గాలిని అరెస్టు చేసిన సమయంలో ఆయన ఇంట్లో 60 కిలోల బంగారం, మూడు కోట్ల రూపాయలు, శనివారం రోజు శ్రీనివాస్ రెడ్డి బ్యాంకు లాకర్లలో 14 కిలోల బంగారం, రెండున్నర కోట్ల రూపాయలు దొరికాయి.

ఇలా గాలి కేసులో కొత్తగా పలు కోణాలు బయట పడుతుంటడంతో పూర్తి విచారణ కోసం తమకు వారిని మరిన్ని రోజులు కస్డటీకి అప్పగించాలని కోరే అవకాశమున్నట్లుగా కనిపిస్తోంది. కోర్టు వారిని కస్టడీకి అప్పగించిన రోజునే సిబిఐ జెడి లక్ష్మీ నారాయణ విచారణకు ఆ సమయం సరిపోదని చెప్పారు కూడా. దీంతో సిబిఐ అధికారులు సోమవారం కోర్టును కస్టడి పొడిగింపు కోసం కోరే అవకాశాలు కనిపిస్తున్నాయి. ఇంకా గాలి జనార్ధన్ రెడ్డిని కూడా బళ్లారి తీసుకు వెళ్లి ఆయన బ్యాంకు లాకర్లు కూడా తెరిపించాల్సి ఉందని తెలుస్తోంది.

Published On September 18, 2011