బొత్సపై కోమటిరెడ్డి వ్యాఖ్యలు: కె కేశవరావు వివరణ

By Srinivas

Published: Sunday, September 18, 2011, 18:02 [IST]

హైదరాబాద్: ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణను తెలంగాణ ప్రాంతంలో తిరగనివ్వమని మంత్రి కోమటిరెడ్డి వెంకట్ రెడ్డి కేవలం ఆవేదనతో మాత్రమే అన్నారని కాంగ్రెసు పార్టీ రాజ్యసభ సభ్యుడు కె కేశవరావు ఆదివారం వివరణ ఇచ్చారు. రాజీనామాలపై తెలంగాణ కాంగ్రెసు ప్రజా ప్రతినిధులు రాజీ పడే ప్రసక్తి లేదన్నారు. ఈ నెల 25వ తారీఖు లోగా ఢిల్లీకి వెళతామని చెప్పారు. త్వరలో తెలంగాణ కోసం ఓ కార్యక్రమాన్ని నిర్వహిస్తామన్నారు. మంత్రి పొన్నాల లక్ష్మయ్య ఇంటి ముంది తెలంగాణవాదుల ఆందోళన సరికాదన్నారు.

సకల జనుల సమ్మె వద్దనే వారు ముందుకు వచ్చి తెలంగాణ ఇప్పిస్తే మంచిదని ఆయన సూచించారు. సమ్మె వల్ల ఇబ్బందులు పడే ఉద్యోగులను మేం ఆదుకుంటామని ప్రకటించారు. ఎస్మా పేరుతో ఉద్యోగులను ప్రభుత్వం రెచ్చగొట్టవద్దని కోరారు. సమ్మెకు తెలంగాణ కాంగ్రెసు మద్దతు ఉంటుందన్నారు. సమ్మెలతో సాధించలేమని అనుకోవడం పొరపాటన్నారు. సమ్మెల ద్వారా ఎన్నో సాధించారన్నారు. ప్రజా ఉద్యమాన్ని ప్రభుత్వం అణిచి వేయాలని చూస్తే ప్రజాస్వామ్యాన్ని అర్థం చేసుకోలేక పోవడమే అన్నారు.

Published On September 18, 2011