పొన్నాల ఇంటిముందు చావుడప్పు, జానా ఘెరావ్

By Srinivas

Published: Sunday, September 18, 2011, 14:16 [IST]

హైదరాబాద్/వరంగల్: తెలంగాణవ్యాప్తంగా సకల జనుల సమ్మె ఉధృతమవుతోంది. ఆదివారం పలుచోట్ల తెలంగాణవాదులు తెలంగాణ కోసం రాజీనామా చేయాలని ప్రజాప్రతినిధుల ఇళ్ల ముందు ఆందోళన చేశారు. వరంగల్ జిల్లాలో మంత్రి పొన్నాల లక్ష్మయ్య ఇంటిని ముట్టడించి ఇంటి ముందు తెలంగాణ ఎమ్మార్పీఎస్ కార్యకర్తలు చావు డబ్బు నిర్వహించారు. పొన్నాల వెంటనే రాజీనామా చేయాలని డిమాండ్ చేశారు. రాజీనామా చేయకుంటే బయట తిరగనివ్వమని హెచ్చరించారు. అనంతరం పొన్నాల శవయాత్ర నిర్వహించి ఆయన దిష్టిబొమ్మను దగ్ధం చేశారు.

మహబూబ్ నగర్‌లో పార్లమెంటు సభ్యుడు బలరాం నాయక్‌ని తెలంగాణవాదులు అడ్డుకున్నారు వెంటనే రాజీనామా చేయాలని డిమాండ్ చేశారు. మరోవైపు నిజామాబాద్ జిల్లాలో తెలంగాణ కోసం రాజీనామా చేసిన పోచారం శ్రీనివాస్ రెడ్డిని భారీ మెజార్టీతో గెలిపిస్తామని పలు ఊళ్లలో ఏకగ్రీవ తీర్మానం చేశారు. సింగరేణి కార్మికుల అరెస్టును నిరసిస్తూ ఖమ్మం, వరంగల్, నల్గొండ తదితర జిల్లాల్లో జెఏసి కార్యకర్తలు రోడ్లపైకి వచ్చి ఆందోళన నిర్వహించారు. రాస్తారోకో చేశారు.

మంత్రి జానారెడ్డిని నల్గొండ జిల్లా చౌటుప్పల్‌లో తెలంగాణవాదులు ఘెరావ్ చేశారు. రాజీనామా చేయాలని డిమాండ్ చేశారు. అయితే పోలీసుల సహాయంతో ఆయన బయట పడ్డారు. సమ్మెకు మద్దతుగా ఆసుపత్రులలో వైద్యులు, నర్సులు భోజన విరామ సమయంలో తమ ఆందోళన వ్యక్తం చేశారు.

Published On September 18, 2011