అజ్ఝాతంలోకి ఎనిమిది మంది గాలి జనార్దన్ రెడ్డి మిత్రులు

By Pratap

Published: Tuesday, September 20, 2011, 9:38 [IST]

హైదరాబాద్: సిబిఐ విచారణను తప్పించుకోవడానికి అక్రమ మైనింగ్ కేసులో నిందితుడు గాలి జనార్దన్ రెడ్డి మిత్రులు ఎనిమిది మంది అజ్ఞాతంలోకి వెళ్లారు. వారందరికీ సిబిఐ నోటీసులు జారీ చేసింది. కానీ వారు సిబిఐ ముందు హాజరు కాలేదు. దీంతో సిబిఐ వారి కోసం గాలింపు చర్యలు చేపట్టింది. అయితే, వారు తమ కార్యాలయాల్లో గానీ ఇళ్లలో గానీ లేకుండా పోయారు. ముడి ఇనుము అక్రమ తవ్వకాలకు, వ్యాపారానికి, సరఫరాకు సంబంధించిన కీలకమైన సమాచారం వారి వద్ద ఉంటుందని సిబిఐ అధికారులు అనుమానిస్తున్నారు. ఆ కారణంగానే వారు తప్పించుకుంటున్నారని భావిస్తున్నారు.

ఆజ్ఞాతంలోకి వెళ్లిన గాలి జనార్దన్ రెడ్డి అనుచరుల గురించి సిబిఐ కోర్టుకు తెలిపామని, అక్రమ గనుల కుంభకోణంలో ప్రభుత్వాధికారుల పాత్రపై దర్యాప్తు చేస్తున్నామని సిబిఐ అధికారులు చెబుతున్నారు. ముడి ఇనుమును వాస్తవంగా వారు ఎక్కడ తవ్వారు, వారి యంత్రాంగమేమిటనే విషయాలను ఆరా తీస్తున్నట్లు వారు తెలిపారు. కాగా, గాలి జనార్దన్ రెడ్డి అనుచరులు మహేష్, స్వస్తిక్ నాగరాజులకు సిబిఐ నోటీసులు జారీ చేసిన విషయం తెలిసిందే. వీరిద్దరికి గాలి జనార్దన్ రెడ్డి వ్యక్తిగత సహాయకుడు ఎం. అలీఖాన్‌తో సంబంధాలున్నట్లు అనుమానిస్తున్నారు.

Published On September 20, 2011