తెలంగాణ సమ్మెపై మెట్టు దిగిన రేణుకా చౌదరి

న్యూఢిల్లీ: తెలంగాణ సమ్మెపై సోమవారం కటువుగా మాట్లాడిన ఎఐసిసి అధికార ప్రతినిధి రేణుకా చౌదరి మెట్టు దిగినట్లు కనిపిస్తున్నారు. తన వ్యాఖ్యలపై తెలంగాణ నేతల నుంచి తీవ్ర వ్యతిరేకత రావడంతో ఆమె తెలంగాణపై మంగళవారం తనను తాను నియంత్రించుకుని మాట్లాడినట్లు కనిపిస్తున్నారు. సమ్మెలు, బెదిరింపుల వల్ల సమస్య పరిష్కారం కాదని ఆమె మంగళవారం మీడియా ప్రతినిధుల సమావేశంలో అన్నారు. చర్చలు, సంప్రదింపుల ద్వారానే సమస్య పరిష్కారమవుతుందని ఆమె అభిప్రాయపడ్డారు.

గత పాతికేళ్లుగా తాను తెలంగాణ నుంచి ప్రాతినిధ్యం వహిస్తున్నానని, తెలంగాణ అభివృద్ధి కోసం తాను ఎంతో చేశానని ఆమె చెప్పుకున్నారు. తెలంగాణలో సమ్మె ప్రభావం లేదని, 80 శాతం సమ్మెలో పాల్గొనలేదని ఆమె సోమవారం అన్నారు. రేణుకా చౌదరి వ్యాఖ్యలపై తెలంగాణ రాష్ట్ర సమితి నేతలు హరీష్ రావు, వినోద్, తెలంగాణ రాజకీయ జెఎసి చైర్మన్ కోదండరామ్ తీవ్రంగా మండిపడ్డ్రారు.

English summary

AICC spokesperson Renuka Choudary toned down on Telangana stir today.