నన్నూ నా తల్లిని ఎదుర్కోలేక కుట్ర: వైయస్ జగన్

By Pratap

Published: Tuesday, September 20, 2011, 8:33 [IST]

విజయవాడ: ఒక తల్లిని, ఒక బిడ్డను ఎదుర్కోలేక కాంగ్రెసు, తెలుగుదేశం పార్టీలు నీచ రాజకీయాలకు, కుట్రలకు పాల్పడుతున్నాయని వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆరోపించారు. కృష్ణా జిల్లాలో ఓదార్పు యాత్ర నిర్వహిస్తున్న ఆయన సోమవారం రాత్రి ప్రజలను ఉద్దేశించి మాట్లాడారు. జీనచ్ఛవంలా మారిన కాంగ్రెసును రెండు సార్లు అధికారంలోకి తెచ్చిన వైయస్సార్ మరణిస్తే ఆయన మరణాన్ని తట్టులేక వందల మంది చనిపోతే.. వారి కుటుంబాలను పరామర్శిస్తానని ఆయన కుమారుడిగా తాను మాట ఇప్వడం తప్పా అని జగన్ ప్రశ్నించారు. ఓదార్పుపై ఆంక్షలు విధించి పార్టీ నుంచి బయటకు వెళ్లే పరిస్థితి కల్పించారని ఆయన విమర్శించారు.

తాను పార్టీ నుంచి బయటకు వచ్చిన రెండు నెలలకే ఆదాయం పన్ను శాఖ నోటీసులిచ్చారని, అదీ చాలక కాంగ్రెసు మంత్రుల చేతనే కోర్టులో కేసులు వేయించారని, అంతటితో ఆగకుండా చంద్రబాబుతో కుమ్మక్కయి కోర్టుల దాకా కలిసి ప్రయాణిస్తున్నారని ఆయన అన్నారు ఒక తల్లిని, ఒక బిడ్డను ఇబ్బందులు పెట్టడానికి కాంగ్రెసు పెద్దలు, చంద్రబాబు నానా గడ్డీ తింటున్నారని ఆయన వ్యాఖ్యానించారు. కాంగ్రెసు ప్రభుత్వంపై ఆయన తీవ్ర వ్యాఖ్యలు చేశారు.

Published On September 20, 2011