తెలంగాణపై బొత్స సత్యనారాయణది అదే మాట

హైదరాబాద్: కేంద్రం త్వరలో తెలంగాణ సమస్యకు పరిష్కారం చూపిస్తుందని ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ బుధవారం ఏర్పాటు చేసిన మీడియా సమావేశంలో చెప్పారు. ప్రజలు తీవ్ర ఇబ్బందులు ఎదుర్కొంటున్నందున సకల జనుల సమ్మెలో పాల్గొంటున్న ఉద్యోగులు సమ్మెపై పునరాలోచించుకోవాలని విజ్ఞప్తి చేశారు. సకల జనుల సమ్మె వల్ల ఇరుప్రాంతాలకు ఇబ్బందే అయితే తెలంగాణ ప్రాంత ప్రజలకు ఎక్కువ ఇబ్బందవుతుందనే విషయాన్ని గుర్తించాలన్నారు. యూసఫ్ గూడలో ఆటో డ్రైవర్ మృతికి కారణమైన ఆర్టీసీ డ్రైవర్ గత మూడేళ్లుగా ఆర్టీసీలోనే కాంట్రాక్టు డ్రైవర్‌గా పని చేస్తున్నారన్నారు.

ఉద్యోగులు వెంటనే సమ్మెను విరమించాలని విజ్ఞప్తి చేశారు. కాంట్రాక్టు ఉద్యోగులతో సాయంత్రం చర్చలు జరుపుతామని చర్చల అనంతరమే ఏం చేయాలనే దానిపై నిర్ణయం తీసుకుంటామని చెప్పారు. ఉత్తరాంధ్రలో ఈ నెల 25వ తారీఖున కాంగ్రెసు గర్జన ఉంటుందని అందులో తిరుపతి శాసనసభ్యుడు చిరంజీవి, ముఖ్యమంత్రి కిరణ్ కుమార్ రెడ్డి పాల్గొంటారని చెప్పారు. కాగా యూసఫ్ గూడలో జరిగిన ప్రమాదంపై తెలంగాణ ప్రాంత న్యాయవాదులు హెచ్చార్సీకి ఫిర్యాదు చేశారు. ఈ నెల 30వ తేది లోగా వివరణ ఇవ్వాలని ట్రాన్సుపోర్టు కమినర్‌ను హెచ్చార్సీ ఆదేశించింది.

English summary

PCC Chief Botsa Satyanarayana repeated his words on telangana in his press meet today. He appealed employees to withdraw sakala janula strike.