మేమూ రాజీనామాలు చేస్తాం: కోమటిరెడ్డికి ఎర్రబెల్లి

హైదరాబాద్: ఈ నెలాఖరులోగా కేంద్రం తెలంగాణకు అనుకూలంగా నిర్ణయం తీసుకోకుంటే అక్టోబర్ 2వ తేదిన తాను రాజీనామా చేస్తానని తెలంగాణ తెలుగుదేశం పార్టీ ప్రజా ప్రతినిధులు సైతం తమతో కలిసి రావాలని మంత్రి కోమటిరెడ్డి వెంకట్ రెడ్డి చేసిన సూచనకు టిడిపి స్పందించింది. తెలంగాణ తెలుగుదేశం సీనియర్ ఎమ్మెల్యే ఎర్రబెల్లి దయాకర్ రావు తాము సైతం రాజీనామాకు సిద్ధమన్నారు. కోమటిరెడ్డితో పాటు 2వ తేదిన రాజీనామాలు చేయడానికి తామూ సిద్ధంగా ఉన్నామన్నారు. ఈ సందర్భంగా ఆయన కాంగ్రెసు నేతలపై విరుచుకు పడ్డారు. కాంగ్రెసు తెలంగాణ ఇస్తామని మోసం చేసిందన్నారు.

కాంగ్రెసు ప్రజాప్రతినిధులు పదవులు పొంది తెలంగాణ మరిచారని విమర్శించారు. వచ్చే నెల 2వ తేదిన టిడిపి ఎమ్మెల్యేలంతా రాజీనామాకు సిద్ధంగా ఉన్నారని ప్రకటించారు. తెలంగాణకు టిడిపి వ్యతిరేకం కాదన్నారు. కొందరు కుట్రపూరితంగా టిడిపి తెలంగాణకు వ్యతిరేకమన్న భావన ప్రజల్లో కలిగించే ప్రయత్నాలు చేస్తున్నారన్నారు. ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, ముఖ్యమంత్రి కిరణ్ కుమార్ రెడ్డి, కాంగ్రెసు పార్టీ అధిష్టానంతో మంత్రి కోమటిరెడ్డి తెలంగాణకు అనుకూలంగా ప్రకటన చేయిస్తే తమ అధినేత చంద్రబాబు నాయుడుచే కేంద్రానికి లేఖను రాయిస్తామన్నారు.

English summary

TDP senior MLA Errabelli Dayakar Rao responded today on minister Komatireddy Venkat Reddy comments.