గాలి జనార్ధన్ రెడ్డి గుట్టు కూపి లాగుతున్న సిబిఐ

By Srinivas

Published: Wednesday, September 21, 2011, 17:40 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డికి చెందిన ఓబుళాపురం మైనింగ్ కార్పొరేషన్‌లో జరిగిన అక్రమాల గుట్టును సిబిఐ లాగుతోంది. ఓఎంసి అక్రమాలపై విచారణ వేగవంతం చేసింది. గత కొన్ని రోజులుగా గాలి జనార్ధన్ రెడ్డి సన్నిహితుల ఇళ్లలో సిబిఐ సోదాలు నిర్వహిస్తోంది. ఇటీవల బళ్లారిలోని ఓ జెడ్పీటీసి, మరో వ్యక్తి ఇళ్లలోనూ సోదాలు చేసింది. ఆ తర్వాత ఓఎంసి ఎండి శ్రీనివాస్ రెడ్డిని బళ్లారి తీసుకు వెళ్లి ఆయన లాకర్లు తెరిపించింది. ఇలా ఏ రోజుకారోజు గాలికి సంబంధించిన కేసులో విచారణలో వేగం పెంచింది.

తాజాగా బుధవారం అనంతపురం జిల్లాలోని గాలి సన్నిహితుల ఇళ్లలో సిబిఐ సోదాలు చేసేందుకు వెళ్లినట్లుగా తెలుస్తోంది. ముగ్గురు అధికారులతో కూడిన ఓ బృందం అనంతకు వెళ్లినట్లుగా తెలుస్తోంది. అక్కడి గాలి సన్నిహితులలో సోదాలు చేసి గుట్టుచప్పుడు కాకుండా విచారణ చేస్తున్నట్లుగా తెలుస్తోంది. గాలి అరెస్టు తర్వాత డబ్బు భారీగా తరలి పోయిందనే ఆరోపణల నేపథ్యంలో అలా తరలిన డబ్బు పైనా సిబిఐ దృష్టి సారించినట్లుగా తెలుస్తోంది.

Published On September 21, 2011