గాలి జనార్ధన్ రెడ్డి కస్టడి, బెయిల్ కేసు వాయిదా

By Srinivas

Published: Wednesday, September 21, 2011, 11:59 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డి సిబిఐ కస్టడీ కేసు ఈ నెల 23వ తేదికి వాయిదా పడింది. బుధవారం నాంపల్లి ప్రత్యేక కోర్టు గాలి జనార్ధన్ రెడ్డి, ఓఎంసి డైరెక్టర్ శ్రీనివాస్ రెడ్డిని తమ కస్టడీకి అప్పగించాలని సిబిఐ వేసిన పిటిషన్‌ను శుక్రవారానికి వాయిదా వేసింది. మరోవైపు గాలి జనార్ధన్ రెడ్డి, శ్రీనివాస్ రెడ్డిలు వేసిన బెయిల్ పిటీషన్ కేసునూ అదే రోజుకు వాయిదా వేసింది. సకల జనుల సమ్మెలో భాగంగా తెలంగాణ ప్రాంత న్యాయవాదులు కోర్టుకు హాజరు కాలేదు. గాలి తరఫు న్యాయవాదులు సైతం కోర్టుకు హాజరు కాలేదు.

కాగా గాలి, శ్రీనివాస్ రెడ్డిలను తమ కస్టడీకి అప్పగించాలని సిబిఐ కోరడంతో ఈ నెల 13వ తారీఖున వారిని సిబిఐ కస్టడీకి కోర్టు అప్పగించిన విషయం తెలిసిందే. వారం రోజులపాటు కస్టడీలో ఉన్న గాలి, శ్రీనివాస్ రెడ్డిలు అధికారులకు ఏమాత్రం సహకరించలేదు. దీంతో వారి నుండి ఓబుళాపురం అక్రమాలు బయటపెట్టించడానికి మరో తొమ్మిది రోజులు వారి కస్టడీని పొడిగించాలని సిబిఐ సోమవారం పిటిషన్ దాఖలు చేసింది. గాలి న్యాయవాదులు సైతం బెయిలు కోసం అదే రోజు పిటిషన్ దాఖలు చేశారు.

Published On September 21, 2011