విదేశాల్లో గాలి కంపెనీలు, భారీగా పెట్టుబడులు

By Pratap

Published: Wednesday, September 21, 2011, 8:17 [IST]

హైదరాబాద్: గనుల అక్రమాలకు పాల్పడిన కర్ణాటక మాజీ మంత్రి గాలి జనార్దన్ రెడ్డి ఆ డబ్బుతో విదేశాల్లో కంపెనీలు స్థాపించినట్లు సిబిఐ గుర్తించినట్లు వార్తలు వచ్చాయి. నాలుగు దేశాల్లో ఆయన ఎగుమతి ఏజెన్సీలను ఏర్పాటు చేశారని, మరో రెండు దేశాల్లో గనుల తవ్వకాలను లీజుకు తీసుకున్నారని ఓ ప్రముఖ దినపత్రిక రాసింది. వీటి వివరాలను సేకరించేందుకు సిబిఐ ఆదాయం పన్ను శాఖతో పాటు ఇతర శాఖల సహాయం తీసుకుంటున్నారు. ఇదంతా నిధుల మళ్లింపు వ్యవహారం కావడంతో ఎన్‌ఫోర్స్‌మెంట్ డైరెక్టరేట్ కూడా రంగంలోకి దిగుతున్నట్లు సమాచారం. ఈడి కూడా కేసు నమోదు చేసే అవకాశాలున్నట్లు వార్తాకథనాలు తెలియజేస్తున్నాయి.

విదేశాల్లో గిరాకీ ఉన్న సమయంలో తక్కువ ధరకు ఇనుప ఖనిజాన్ని ఎగుమతి చేసి, తాను స్థాపించిన ఎజెన్సీల ద్వారానే అక్కడ ఎక్కువ ధరకు విక్రయించినట్లు చెబుతున్నారు. ఇందుకు గాను విదేశాల్లో స్థాపించిన ఏజెన్సీల్లో ఆయన భార్య, సన్నిహితులు కూడా భాగస్వాములుగా ఉన్నట్లు తెలుస్తోంది. చైనా, సింగపూర్, వియత్నాం, దుబాయ్‌ల్లో ఈ ఏజెన్సీలను స్థాపించినట్లు తెలుస్తోంది. జిజెఆర్ (గాలి జనార్దన్ రెడ్డి) కంపెనీ పేరుతో ఇండోనేషియా, కంపూచియాల్లో పెద్ద యెత్తున గాలి జనార్దన్ రెడ్డి పెట్టుబడులు పెట్టినట్లు చెబుతున్నారు. విదేశాల్లో ఆర్జించిన డబ్బులను హవాలా ద్వారా తిరిగి స్వదేశానికి మళ్లించినట్లు అనుమానిస్తున్నారు.

Published On September 21, 2011