అందుకే ముఖ్యమంత్రి కిరణ్ దిగొచ్చారు: కోదండరామ్

హైదరాబాద్: తమ పీఠాలు కదులుతున్నాయనే అభద్రతా భావంతోనే ముఖ్యమంత్రి కిరణ్ కుమార్ రెడ్డి దిగి వచ్చారని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ బుధవారం అన్నారు. తెలంగాణవ్యాప్తంగా సకల జనుల సమ్మె ప్రభావం లేదని ముఖ్యమంత్రి చెప్పడం విడ్డూరంగా ఉందన్నారు. సమ్మె ప్రభావం లేదని చెప్పిన ముఖ్యమంత్రి ఉద్యోగులు సమ్మె విరమించాలని ఎందుకు విజ్ఞప్తి చేస్తున్నారని ప్రశ్నించారు. సమ్మె ప్రభావంతో తమకు ఎక్కడ ఎసరు వస్తుందోనన్న ఉద్దేశ్యంతోనే సమ్మె లేదని చెబుతూ మరోవైపు సమ్మె విరమించాలని విజ్ఞప్తి చేస్తున్నారన్నారు.

ముఖ్యమంత్రి వ్యాఖ్యలపై మంత్రులు వెంటనే స్పందించాలని డిమాండ్ చేశారు. ప్రభుత్వానికి మద్దతుగా ఇప్పుడు తాత్కాలిక ఉద్యోగాల్లో చేరే వారికి తెలంగాణ వచ్చాక ఉద్యోగాలు ఉండవన్నారు. ప్రభుత్వం తాత్కాలిక నియామకాలు చేపట్టడం సరికాదన్నారు. కాగా సకల జనుల సమ్మె, యూసఫ్ గూడలో బస్సు ఢీకొని ఓ ఆటో డ్రైవర్ మృతి, ఎమ్మెల్యేలు హరీష్ రావు, విష్ణు వర్ధన్ రెడ్డి తదితర పరిణామాల నేపథ్యంలో పిసిసి చీఫ్ బొత్స సత్యనారాయణను కోదండరాం, కెటిఆర్ కలవనున్నారు.

English summary

JAC chairman Kodandaram blamed CM Kiran Kumar Reddy today for his comments on Sakala Janula Strike.