రాజీనామాలు బోగస్, ప్రభుత్వాన్ని కూల్చలేరు: ఆనం

By Srinivas

Published: Friday, September 23, 2011, 14:21 [IST]

హైదరాబాద్: తెలంగాణ ప్రాంత కాంగ్రెసు ప్రజా ప్రతినిధులు చేసిన రాజీనామాలు అన్నీ బోగస్ అని శ్రీ పొట్టి శ్రీరాములు నెల్లూరు జిల్లా శాసనసభ్యుడు ఆనం వివేకానంద రెడ్డి శుక్రవారం విమర్శించారు. రాజీనామా చేసిన వారు విధులకు దూరంగా ఉండాలి. కానీ వారు విధులకు దూరంగా ఉండటం లేదని విమర్శించారు. రాజీనామాలు చేసిన వారికి చిత్తశుద్ధి లేదన్నారు. రాజీనామా చేసినప్పటికీ అవే పదవులు అడ్డం పెట్టుకొని ముఖ్యమంత్రి కిరణ్ కుమార్ రెడ్డిని, కేంద్ర మంత్రి, రాష్ట్ర వ్యవహారాల ఇంఛార్జ్ గులాం నబీ ఆజాదును పలుమార్లు కలుస్తున్నారని ధ్వజమెత్తారు.

సొంత అజెండాతో ప్రభుత్వాన్ని ఎవరూ కూల్చలేరన్నారు. తెలంగాణ నేతలు ఉన్మాద మాటలు మాట్లాడకుంటే బావుంటుందన్నారు. తెలంగాణ ప్రాంతంలో జరుగుతున్న సకల జనుల సమ్మెపై రెఫరెండం నిర్వహించాలని డిమాండ్ చేశారు. తెలంగాణ పైనా రెఫరెండం నిర్వహించాలన్నారు. ప్రజల మద్దతుతో సమ్మెలు జరగాలి. కానీ ఇలాంటి సమ్మెలు సరికావన్నారు. బాన్సువాడ ఉప ఎన్నికలు రెఫరెండం కాదన్నారు.

Published On September 23, 2011