కిరణ్‌ను దింపేందుకు బొత్స యత్నం: కొండా సురేఖ

By Srinivas

Published: Friday, September 23, 2011, 17:20 [IST]

హైదరాబాద్: ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ముఖ్యమంత్రి కిరణ్ కుమార్ రెడ్డిని దింపేసి ఆ పీఠంపై కూర్చోవడానికి ప్రయత్నాలు చేస్తున్నారని వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డి వర్గం కాంగ్రెసు పార్టీ శాసనసభ్యురాలు కొండా సురేఖ శుక్రవారం అన్నారు. కిరణ్ కుమార్ రెడ్డి ముఖ్యమంత్రి కావడం మంత్రులెవరికీ ఇష్టం లేదన్నారు. ఎవరికీ ఇష్టం లేకున్నా ఆయన ముఖ్యమంత్రి పదవిని అలంకరించారన్నారు. కిరణ్‌పై ఎవరికీ గౌరవం లేదన్నారు. జగన్ త్వరలో తెలంగాణ ప్రాంతంలో ఓదార్పు యాత్ర చేస్తారని చెప్పారు. ప్రభుత్వం ప్రకటిస్తున్న సంక్షేమ పథకాల కోసం ఎంత ఖర్చు చేస్తుందో ప్రజలకు వివరించాలని డిమాండ్ చేశారు.

తెలంగాణ రాష్ట్రాన్ని ఇవ్వాల్సిన కాంగ్రెసు పార్టీ ప్రత్యేక రాష్ట్రాన్ని ఇస్తారో లేదో తేల్చాలని డిమాండ్ చేశారు. ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ ముఖ్యమంత్రి పీఠంపై అధిష్టించేందుకు ప్రయత్నాలు చేస్తున్నారన్నారు. జగన్‌కు, కాంగ్రెసు పార్టీలో తన పార్టీని విలీనం చేసిన చిరంజీవికి ఆకాశానికి, భూమికి ఉన్నంత తేడా ఉందన్నారు. చిరంజీవి నైతిక విలువలు వదిలేసి కాంగ్రెసులో చేరితే జగన్ నైతిక విలువల కోసం కాంగ్రెసు వీడారన్నారు. వైయస్సార్సీ పార్టీ కాంగ్రెసులో కలిసి పోతుందన్న తెలుగుదేశం పార్టీ అధినేత నారా చంద్రబాబు నాయుడు కలలు నెరవేరవన్నారు.

Published On September 23, 2011