తెలిస్తే అలా చేస్తాడా: చిరంజీవిపై సిపిఐ నారాయణ

By Srinivas

Published: Friday, September 23, 2011, 18:15 [IST]

న్యూఢిల్లీ: తిరుపతి శాసనసభ్యుడు చిరంజీవి రాజకీయాలు ఏమాత్రం తెలియవని సిపిఐ రాష్ట్ర కార్యదర్శి నారాయణ శుక్రవారం న్యూఢిల్లీలో వ్యాఖ్యానించారు. చిరంజీవికి కాంగ్రెసు రాజకీయాలు తెలిసుంటే తన ప్రజారాజ్యం పార్టీని కాంగ్రెసులో విలీనం చేసి ఉండే వారు కాదని అభిప్రాయపడ్డారు. రాష్ట్రంలో కిరణ్ కుమార్ రెడ్డి ప్రభుత్వం జీవచ్ఛవంలా ఉందన్నారు. తెలంగాణ ప్రాంత కాంగ్రెసు ప్రజా ప్రతినిధులు కాళ్లు లేని అవిటివాళ్లుగా మిగిలి పోయారని విమర్శించారు. నో వర్క్ నో పే అనేది ఉద్యోగుల పైన మాత్రమే కాకుండా దానిని మంత్రుల వద్ద నుండి ప్రారంభించాలని డిమాండ్ చేశారు.

తెలుగుదేశం పార్టీ అధినేత నారా చంద్రబాబు నాయుడు అవకాశవాద రాజకీయాలకు పాల్పడుతున్నారని విమర్శించారు. ఇటు సీమాంధ్ర, అటు తెలంగాణ ప్రాంత నేతలతో చంద్రబాబు ఉత్తుత్తి పోరాటాలు చేయిస్తున్నారని ధ్వజమెత్తారు. వాటిని ప్రజలు గమనిస్తున్నారన్నారు. కేంద్రం తెలంగాణపై జాప్యం చేయకుండా వెంటనే నిర్ణయం ప్రకటించాలని డిమాండ్ చేశారు.

Published On September 23, 2011