జగన్ పార్టీ సలహాదారు సిసిరెడ్డిపై రెండో భార్య ఫిర్యాదు

By Pratap

Published: Friday, September 23, 2011, 8:54 [IST]

హైదరాబాద్: వైయస్ జగన్ నాయకత్వంలోని వైయస్సార్ కాంగ్రెసు పార్టీ సలహాదారు, రాష్ట్ర ప్రభుత్వం మాజీ సలహాదారు సిసి రెడ్డిపై ఆయన రెండో భార్య డాక్టర్ సరోజమ్మా రెడ్డి రాష్ట్ర మానవ హక్కుల కమిషన్‌ (హెచ్‌ఆర్‌సి)కి ఫిర్యాదు చేశారు. ఈ ఫిర్యాదుపై డిసెంబర్ 7న తేదీలోగా నివేదిక సమర్పించాలని హెచ్‌ఆర్సీ ప్రభుత్వ ప్రధాన కార్యదర్శిని, డిజిపిని గురువారం ఆదేశించింది. అమెరికాలో ఉంటున్న 72 ఏళ్ల సరోజమ్మా రెడ్డి తన న్యాయవాది ద్వారా ఆ పిటిషన్ దాఖలు చేశారు. తన మొదటి భార్యతో, ఆమె పిల్లలతో కుమ్మక్కయి తనతో వివాహ సంబంధాన్ని సిసి రెడ్డి నిరాకరిస్తున్నారని, తద్వారా తనకు సామాజిక హోదా ఇవ్వకుండా మనో వేదనకు గురి చేస్తున్నారని ఆమె ఫిర్యాదు చేశారు.

అవసరమైతే తన పిల్లలు, తాను డిఎన్‌ఎ పరీక్షలకు సిద్దంగా ఉంటామని ఆమె చెప్పారు. సిసి రెడ్డి పేరు మీద, ఆయన భార్య సి. సుభద్ర పేరు మీద ఉన్న ఆస్తిలో తనకూ తన పిల్లలకూ వాటా ఇప్పించడంతో పాటు తనకు సామాజిక హోదా కల్పించాలని ఆమె కోరారు. అమెరికా పౌరురాలినైన తనను తన భార్యకు వీసా ఇప్పించడానికి వాడుకున్నాడని ఆమె ఆరోపించారు. కాగా, సిసి రెడ్డి ఎస్‌బిఐ న్యూయార్క్ శాఖ నుంచి ఐదు లక్షల డాలర్ల అప్పు తీసుకున్నాడని, దానికి తాను గ్యారంటీ ఇచ్చానని, సిసి రెడ్డి పరారీలో ఉండడంతో తాను ఆ అప్పును తాను తీర్చాల్సి వస్తోందని ఆమె వివరించారు.

సిసి రెడ్డిగా పేరు మోసిన చవ్వా చంద్రశేఖర రెడ్డి వైయస్ రాజశేఖర రెడ్డి ప్రభుత్వ హయాంలో ప్రభుత్వ సలహాదారుగా నియమితులయ్యారు. ప్రస్తుతం ఆయన వైయస్ జగన్ పార్టీకి సలహాదారుగా ఉన్నారు. సిసి రెడ్డి విషు కన్సల్టెన్స్ పేరు మీద ఎడ్యుకేషనల్ కన్సల్టెన్సీ సర్వీసును నడుపుతున్నారు. సిసి రెడ్డి వైయస్సార్ కుటుంబానికి సన్నిహిత బంధువు కూడా.

Published On September 23, 2011