తెలంగాణ తెలుగుదేశం ఎమ్మెల్యేలపై గుడ్లు, రాళ్లతో దాడి

By Srinivas

Published: Friday, September 23, 2011, 12:53 [IST]

వరంగల్: సకల జనుల సమ్మెకు మద్దతుగా తెలంగాణ తెలుగుదేశం పార్టీ శుక్రవారం చేపట్టిన ఒక్కరోజు దీక్ష తెలంగాణలోని పలు జిల్లాల్లో ఉద్రిక్తతకు దారి తీసింది. పలుచోట్ల తెలంగాణవాదులు స్థానిక శాసనసభ్యులపై దాడులకు దిగారు. ఈ దాడులలో పలువురికి గాయాలు అయ్యాయి. పోలీసులు ఆందోళనకారులపై లాఠీఛార్జ్ చేశారు. వరంగల్ జిల్లాలో నర్సంపేట శాసనసభ్యుడు రేవూరి ప్రకాశ్ రెడ్డి కాన్వాయ్‌పై తెలంగాణవాదులు లక్నేపల్లి వద్ద రాళ్లు, కర్రలతో దాడి చేశారు. కారు అద్దాలు పగులగొట్టారు. ఈ దాడిలో రేవూరి గన్‌మెన్‌కు కొద్దిగా గాయాలైనట్లుగా తెలుస్తోంది. పోలీసులు జోక్యం చేసుకొని ఆందోళనకారులను అక్కడి నుండి పంపించారు. అయితే రేవూరి తన దీక్షను కొనసాగిస్తున్నారు. ఓ టీవీ ఛానల్‌తో మాట్లాడిన రేవూరి దాడిని తీవ్రస్థాయిలో ఖండించారు.

తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖరరావు రాజకీయ లబ్ధి కోసం తెలంగాణ సెంటిమెంటును అడ్డం పెట్టుకొని తెలుగుదేశం ప్రజాప్రతినిధులపై దాడులు చేయిస్తున్నారని ఆరోపించారు. దీనిని ప్రజలంతా గమనించాలని విజ్ఞప్తి చేశారు. సకల జనుల సమ్మెకు మద్దతుగానే తాము దీక్ష చేస్తున్నామని అలాంటప్పుడు తమ దీక్షను ఎలా అడ్డుకుంటాన్నారు. భౌతిక దాడులు ఎంత వరకు సమంజసమన్నారు. ప్రజాస్వామ్యవాదులంతా ఈ దాడులను ఖండించాలన్నారు. జెఏసిని తొత్తుగా మార్చుకొని కెసిఆర్ ఇలాంటి దాడులకు పాల్పడుతున్నారని విమర్శించారు. టిడిని దెబ్బతీయడానికే భౌతిక దాడులన్నారు.

మహబూబ్ నగర్ జిల్లా జడ్చర్ల శాసనసభ్యుడు చంద్రశేఖర రావుపైన తెలంగాణవాదులు రాళ్లు, గుడ్లతో దాడి చేశారు. వెంటనే రాజీనామా చేయాలని డిమాండ్ చేశారు. టిడిపి, టిఆర్ఎస్ మధ్య పరిస్థితి ఉద్రిక్తంగా మారడంతో పోలీసులు లాఠీఛార్జ్ చేసి చెదరగొట్టారు. అదిలాబాదు పార్లమెంటు సభ్యుడు రమేష్ రాథోడ్ దీక్షలో సైతం తెలంగాణవాదులు దూసుకెళ్లి అడ్డుకునే ప్రయత్నాలు చేశారు. హన్మకొండలో టిడిపి దీక్ష శిబిరంలోకి టిఆర్ఎస్ కార్యకర్తలు చొచ్చుకెళ్లారు. పోలీసులు లాఠీఛార్జ్ చేయాల్సి వచ్చింది. ఇక మరో ఎమ్మెల్యే మోత్కుపల్లి నరసింహులును తెలంగాణవాదులు జనగామ దగ్గర్లోని నెల్లుట్లలో అడ్డుకున్నారు. రాజీనామా చేయాలని డిమాండ్ చేశారు.

Published On September 23, 2011