చిరు హిట్ సిఎం ఫట్, ఓదార్పు చేపట్టాలి: అంబటి

By Srinivas

Published: Monday, September 26, 2011, 14:12 [IST]

గుంటూరు: ప్రజారాజ్యం తరఫున పోటీ చేసి ఓడిపోయిన వారి కోసం తిరుపతి శాసనసభ్యుడు చిరంజీవి ఓదార్పు యాత్ర చేపట్టాలని వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు సోమవారం సూచించారు. చిరంజీవిని నమ్ముకొని గత ఎన్నికల్లో పలువురు లక్షలు, కోట్ల రూపాయలు ఖర్చు చేసి పోటీ చేసి ఓడి పోయారని ఇళ్లు గుల్ల చేసుకున్న వారిని చిరంజీవి ఓదార్చితే బాగుంటుందన్నారు. ఆయన మిడి మిడి జ్ఞానంతో మాట్లాడుతున్నారని విమర్శించారు. చిరుకు సెజ్‌ల గురించి తెలియకుంటే ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణను అడిగి తెలుసుకోవాలని సూచించారు.

పార్టీని హోల్ సేల్‌గా చిరంజీవి అమ్మి నమ్మిన వారిని ముంచారన్నారు. కాంగ్రెసులో చిరంజీవి హిట్ అయితే కిరణ్ ఫట్ అవుతారన్నారు. బొత్స సత్యనారాయణ ఏ స్థాయి నుండి వచ్చారో తెలుసుకోవాలన్నారు. గతంలో జగన్‌కు మద్దతు ఇవ్వాలని చిరంజీవిని ఎవరు అడిగారో ఆ పేర్లు బయటకు చెప్పాలని అంబటి డిమాండ్ చేశారు. చిరుకు ఇప్పుడు నచ్చిన కాంగ్రెసు పీఆర్పీ పెట్టినప్పుడు నచ్చలేదా అని ప్రశ్నించారు.

ముఖ్యమంత్రి కిరణ్ కుమార్ రెడ్డి ఏడాది సమయం అడుగుతున్నారని ఆయన ఆ సమయం ఎవరిని అడుగుతున్నారని ప్రశ్నించారు. పీఠంపై అభద్రతా భావంతో ఆయన మాట్లాడుతున్నారన్నారు. పదవి గండం ఉందనే భయం ఆయనలో కనిపిస్తోందన్నారు. 104, 108 ఉద్యోగులను కాపాడి తర్వాత ముఖ్యమంత్రి లక్షల ఉద్యోగాలు ఇస్తే బావుంటుందని అభిప్రాయపడ్డారు.

Published On September 26, 2011