తెలంగాణపై ఎట్టకేలకు నోరు విప్పిన చంద్రబాబు

By Pratap

Published: Monday, September 26, 2011, 19:09 [IST]

హైదరాబాద్: తెలంగాణపై ఎట్టకేలకు తెలుగుదేశం పార్టీ అధ్యక్షుడు నారా చంద్రబాబు నాయుడు నోరు విప్పారు. తెలంగాణపై కాంగ్రెసు పార్టీని ఆయన తప్పు పట్టారు. వరంగల్ జిల్లా పరకాలకు చెందిన కాంగ్రెసు, వైయస్సార్ కాంగ్రెసు కార్యకర్తలు సోమవారం తెలుగుదేశం పార్టీలో చేరారు. ఈ సందర్భంగా ఆయన మాట్లాడారు. తెలంగాణపై తాము చెప్పాల్సింది ఎప్పుడో చెప్పామని, నిర్ణయం తీసుకోవాల్సింది కేంద్ర ప్రభుత్వమేనని ఆయన అన్నారు. కావాలనే తెలంగాణపై నిర్ణయం తీసుకోవడంలో కేంద్రం జాప్యం చేస్తోందని ఆయన అన్నారు. రాష్ట్రంలో ప్రస్తుత అనిశ్చితికి కారణం కాంగ్రెసు పార్టీయేనని ఆయన విమర్శించారు. తెలంగాణపై నిర్ణయం తీసుకోవాల్సిన బాధ్యత, అధికారం కాంగ్రెసుకే ఉందని ఆయన అన్నారు.

తెలంగాణ ప్రజల మనోభావాలకు అనుగుణంగానే తాము నిజామాబాద్ జిల్లాలోని బాన్సువాడ శానససభా నియోజకవర్గంలో తమ పార్టీ పోటీ చేయడం లేదని ఆయన చెప్పారు. రాష్ట్రం అభివృద్ధి చెందుతున్న సమయంలో అనిశ్చితి చోటు చేసుకుందని ఆయన అన్నారు. తెలంగాణ ప్రజల మనోభావాలను గౌరవిస్తున్నది తమ పార్టీ ఒక్కటేనని ఆయన అన్నారు. తమ పార్టీని దెబ్బ తీయాలని కాంగ్రెసు, తెలంగాణ రాష్ట్ర సమితి (తెరాస) కుట్ర చేస్తున్నాయని, అది ఎన్నిటికీ జరగదని ఆయన అన్నారు. ప్రజలకు రక్షణ కల్పించాల్సిన బాధ్యత ప్రభుత్వానిదేనని ఆయన అన్నారు.

Published On September 26, 2011