ఐటిని తాకిన తెలంగాణ సెగ, ఎమ్మెల్యే మంచిరెడ్డి అరెస్టు

By Srinivas

Published: Monday, September 26, 2011, 10:36 [IST]

హైదరాబాద్: తెలంగాణలో జరుగుతున్న సకల జనుల సమ్మె సోమవారం ఐటిని తాకింది. హైటెక్ సిటి ప్రాంతానికి వెళ్లే ఐటి ఉద్యోగులను తెలంగాణవాదులు కూకట్‌పల్లి - హైటెక్ సిటీ రహదారిలో అడ్డుకున్నారు. భారీగా రహదారి పైకి వచ్చిన తెలంగాణవాదులు హైటెక్ సిటీ వెళ్లే అన్ని దారులను మూసి వేశారు. ఐటి కార్యాలయాలు మూసి వేయాలంటూ నినాదాలు చేశారు. విధులకు వెళ్తున్న ఉద్యోగులను అడ్డుకున్నారు. దీంతో ఆయా ప్రాంతాలలో భారీగా ట్రాఫిక్ జాం అయింది.

కాగా శాసనసభ్యుడు మంచిరెడ్డి కిషన్ రెడ్డితో సహా పలువురు ఆందోళనకారులు ఎన్జీవోస్ కాలనీ వెళుతున్న రెండు ఆర్టీసి బస్సులను వనస్థలిపురం వద్ద అడ్డుకున్నారు. పలువురు ఆందోళనకారులు రెండు బస్సుల అద్దాలను ధ్వంసం చేశారు. పరిస్థితి విషమిస్తున్నట్లుగా కనిపించడంతో పోలీసులు కిషన్ రెడ్డిని అరెస్టు చేసి మీర్ పేట పోలీసు స్టేషన్‌కు తరలించారు. కాగా తెలంగాణవ్యాప్తంగా సకల జనుల సమ్మెకు మద్దతుగా పలు చోట్ల పరిశ్రమలు మూత పడ్డాయి.

Published On September 26, 2011