సబితపై చర్యలా? నా రాజీనామానా?: శంకరరావు

By Srinivas

Published: Monday, September 26, 2011, 15:37 [IST]

హైదరాబాద్: హోంమంత్రి సబితా ఇంద్రారెడ్డిపై చేనేత, జౌళీ శాఖ మంత్రి శంకరరావు సోమవారం తీవ్రస్థాయిలో ధ్వజమెత్తారు. సబితా ఇంద్రారెడ్డి డబ్బులు దండుకొని పదవులు ఇస్తున్నారని ఆయన ఆరోపించారు. పోలీసుల బదిలీలకు, పదవులు ఇవ్వడానికి హోంమంత్రి డబ్బులు తీసుకుంటున్నారని తీవ్ర ఆరోపణలు చేశారు. ఇలా అయితే పదవులకు టెండర్లు పెడితే బాగుంటుందని ఎద్దేవా చేశారు. ముఖ్యమంత్రి కిరణ్ కుమార్ రెడ్డి సైతం అవినీతి మంత్రి సబితారెడ్డికి ప్రాధాన్యత ఇస్తున్నారని ఆవేదన వ్యక్తం చేశారు.

అక్టోబర్ 2 లోగా సబితా ఇంద్రారెడ్డిపై ముఖ్యమంత్రి చర్యలు తీసుకోవాలన్నారు. లేదా తాను తన మంత్రి పదవికి రాజీనామా చేస్తానని హెచ్చరించారు. మంత్రి కుటుంబ సభ్యులే అవినీతి, అక్రమాలలో దోషులన్నారు. సబితా ఇంద్రారెడ్డి అక్రమాలపై తన వద్ద పూర్తి ఆధారాలు ఉన్నాయన్నారు. ముఖ్యమంత్రి వెంటనే చర్యలు తీసుకోవాలని డిమాండ్ చేశారు. అవినీతిని ముఖ్యమంత్రి సీరియస్‌గా తీసుకోవాలని, తాను నిత్యం అవినీతిపై పోరాటం చేస్తానన్నారు.

Published On September 26, 2011