పోలీసులతో తోపులాట, కిందపడిన హరీష్, చినిగిన చొక్కా

By Srinivas

Published: Tuesday, September 27, 2011, 13:56 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్ ఆర్టీఏ కార్యాలయానికి వెళ్లారని తెలిసిన తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు, నిజామాబాద్ పార్లమెంటు సభ్యుడు మధుయాష్కీ, జూబ్లీహిల్స్ శాసనసభ్యుడు విష్ణువర్ధన్ రెడ్డి, మరో ఎమ్మెల్యే కొప్పుల ఈశ్వర్ తదితరులు ఆర్టీఏ కార్యాలయానికి వెళ్లారు. కార్యాలయంలోకి చొచ్చుకు వెళ్లే ప్రయత్నం చేశారు. దీంతో అక్కడ పరిస్థితి ఉద్రిక్తంగా మారింది. గేటు వద్దనే ప్రజాప్రతినిధులను పోలీసులు అడ్డుకున్నారు. దీంతో రెచ్చిపోయిన తెలంగాణవాదులు ఆర్టీఏ కార్యాలయానికి తాళం వేశారు. పోలీసులు వారిని చెదరగొట్టే ప్రయత్నం చేశారు. అయితే ఈ ఘటనలో హరీష్ రావు కింద పడి స్పృహ కోల్పోయారు. కొప్పుల ఈశ్వర్‌ను పోలీసులు బూటు కాలుతో తన్నినట్లుగా తెలంగాణవాదులు ఆరోపిస్తున్నారు.

అనంతరం పోలీసులు హరీష్ రావును, విష్ణును, ఈశ్వర్, మధుయాష్కీని అరెస్టు చేశారు. ఈ సందర్భంగా వారు మాట్లాడుతూ లగడపాటికి ఎంత దమ్ముంటే ఉద్యమం జరుగుతున్న సమయంలో ఇక్కడకు వచ్చి తెలంగాణవాదులను రెచ్చగొట్టే ప్రయత్నాలు చేస్తారని ప్రశ్నించారు. లగడపాటికి రెడ్ కార్పెట్ పరిచిన అధికారులు తమను ఎందుకు అనుమతించడం లేదని ప్రశ్నించారు. లగడపాటి దీక్ష వల్లనే తెలంగాణ రాష్ట్రం ఆగిపోయిందని ఆరోపించారు. పోలీసు తీరుపై హరీష్ రావు తీవ్ర ఆగ్రహం వ్యక్తం చేశారు. లగడపాటికి రెడ్ కార్పెట్ పరిచిన పోలీసులు తమపై దౌర్జన్యానికి పూనుకున్నారని ఆయన అన్నారు. ఎమ్మెల్యే కొప్పుల ఈశ్వర్‌ను బూటు కాళ్లతో తన్నారని ఆయన అన్నారు.

Published On September 27, 2011