జగడమే: కెసిఆర్‌తో యుద్ధానికి సిద్ధమౌతున్న టిటిడిపి

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావును గట్టిగా ఢీకొనేందుకు తెలంగాణ తెలుగుదేశం పార్టీ వ్యూహం రచిస్తోంది. తెలంగాణ పేరుతో కెసిఆర్ కేవలం తెలుగుదేశం పార్టీనే లక్ష్యంగా చేసుకోవడాన్ని వారు జీర్ణించుకోలేక పోతున్నారు. తెలంగాణ ఇవ్వాల్సింది తేవాల్సింది కాంగ్రెసు పార్టీ అయినప్పటికీ కేవలం టిడిపినే ఆయన లక్ష్యంగా చేసుకోవడంపై ఇప్పటికే వారు గుర్రుగా ఉన్నారు. సకల జనుల సమ్మెకు మద్దతుగా ఈ నెల 23న తెలంగాణవ్యాప్తంగా పది జిల్లాల్లో చేసిన దీక్షలపై టిఆర్ఎస్ కార్యకర్తలు దాడి చేశారు. పలుచోట్ల పరిస్థితి తీవ్ర ఉద్రిక్తతకు దారి తీసింది. ఈ ఘటనతో టిటిడిపి నేతలకు మరింత ఆగ్రహం తెప్పించింది. దీంతో వారు కెసిఆర్‌తో ఢీకొనేందుకు వ్యూహరచన చేస్తున్నట్లుగా తెలుస్తోంది. అందులో భాగంగా మంగళవారం గన్ పార్కు వద్ద టిఆర్ఎస్‌కు వ్యతిరేకంగా ఆందోళన చేపట్టనున్నారు.

టిఆర్ఎస్‌ను ఎదుర్కోవడానికి వారు అస్త్రాలు సిద్ధం చేసుకుంటున్నట్లుగా తెలుస్తోంది. తెలంగాణ ముసుగులో కెసిఆర్ రాజకీయం చేస్తున్నారని కేంద్రంపై ఒత్తిడి తెచ్చే భాగంలో ఉప ఎన్నికలను బహిష్కరిద్దామనే తమ సూచనను కెసిఆర్ బేఖాతరు చేశారని తెలంగాణ పేరుతో తన సీట్లు పెంచుకోవాలని చూస్తున్నారనే భావనను ప్రజల్లోకి గట్టిగా తీసుకు వెళ్లే ప్రయత్నాలు చేస్తున్నట్లుగా తెలుస్తోంది. కెసిఆర్‌కు తెలంగాణపై చిత్తశుద్ధి ఉంటే బాన్సువాడ ఉప ఎన్నికలు బహిష్కరించడంతో పాటు రాజ్యాంగ సంక్షోభం కోసం తమతో కలిసి రాజీనామాలు చేసి మళ్లీ పోటీ చేయకూడదనే తమ నిర్ణయానికి కట్టుబడి ఉండాలని అలాకాకుండా రాజీనామాలు చేసి తిరిగి పోటీ చేయడం వల్ల కలిగే ప్రయోజనం ఏమీ లేదని పోటీ చేయకుండా ఉంటేనే కేంద్రంపై ఒత్తిడి వస్తుందనే భావనను ప్రజల్లోకి తీసుకు వెళ్లాలనే యోచనలో ఉన్నట్లుగా తెలుస్తోంది.

తెలంగాణ ఇచ్చే పరిస్థితుల్లో ఉన్న కాంగ్రెసుతో కలిసి టిఆర్ఎస్ ముందుకు వెళ్లడాన్ని సైతం ప్రజల ముందుకు తీసుకు వెళ్లాలనుకుంటున్నట్లుగా తెలుస్తోంది. తెలంగాణలోటిడిపిని నిర్వీర్యం చేయడానికే కాంగ్రెసుతో కెసిఆర్ వెళుతున్నాడు తప్ప తెలంగాణపై చిత్తశుద్ధితో కాదనే అస్త్రంతో ముందుకు రానున్నారు. ఇక ఇటీవల తమ దీక్షలపై జరిగిన దాడిని నిరసిస్తూ మరోసారి ఇలాంటివి జరిగితే తాము అదే స్థాయిలో స్పందించాల్సి వస్తుందని టిఆర్ఎస్‌ను హెచ్చరించే ప్రయత్నాలు వారు చేయనున్నారని తెలుస్తోంది. ఇక ఐకాస చైర్మన్ కోదండరామ్‌నూ టార్గెట్ చేసుకోనుంది. కెసిఆర్ రాజకీయం కోసమే ఉద్యమిస్తున్నాడని ప్రజలకు చెప్పేందుకు ఆయన గతంలో చేసిన పలు కామెంట్లను టిటిడిపి చెక్ చేస్తున్నట్లుగా తెలుస్తోంది.

English summary

Telangana Telugudesam Party is ready to attack Telangana Rastra Samithi president K Chandrasekhar Rao with some issue. TDP is going to agitate at gunpark today for TRS attack on TTDP on 23rd.