ప్రధాని మన్మోహన్‌కు తెలంగాణ కాంగ్రెసు లేఖాస్త్రం

By Pratap

Published: Wednesday, September 28, 2011, 16:08 [IST]

న్యూఢిల్లీ: తెలంగాణపై ప్రధాని డాక్ట్రర్ మన్మోహన్ సింగ్‌కు లేఖాస్త్రం సంధించాలని కాంగ్రెసు తెలంగాణ నాయకులు నిర్ణయించుకున్నారు. తెలంగాణకు చెందిన రాజ్యసభ సభ్యుడు వి. హనుమంతరావు నివాసంలో తెలంగాణ కాంగ్రెసు ప్రజాప్రతినిధులు మధ్యాహ్నం విందు సమావేశంలో పాల్గొన్నారు. ఈ సమావేశానికి తెలంగాణకు చెందిన మంత్రులు, పార్లమెంటు సభ్యులు, శానసభ్యులు కూడా వచ్చారు. కేంద్ర మంత్రి జైపాల్ రెడ్డి కూడా సమావేశానికి హాజరయ్యారు. తెలంగాణకు అనుకూలంగా వెంటనే నిర్ణయం ప్రకటించాలని, లేదంటే తాము ఒత్తిడిని తట్టుకోలేమని వారంటున్నారు. తెలంగాణ కాంగ్రెసు పరిస్థితి దీనంగా మారుతోందని వారు ఆ లేఖలో చెప్పనున్నారు.

పార్టీని, ప్రభుత్వాన్ని గౌరవిస్తూ తాము ఒత్తిడిని ఎదుర్కుంటున్నామని, అయితే ఇంకెంత మాత్రమూ దాన్ని ఎదుర్కోలేమని, తక్షణమే తెలంగాణ రాష్ట్రం ఏర్పాటుకు ప్రకటన చేయాలని వారు కోరుతున్నారు. తెలంగాణ రగిలిపోతోందని, వెంటనే తెలంగాణ ప్రకటన చేయాలని రాజ్యసభ సభ్యుడు కె. కేశవరావు అన్నారు. తెలంగాణ ప్రకటన చేయకపోతే పరిస్థితి చేయి దాటిపోతోందని ఆయన అన్నారు. రాజీనామాలు చేస్తే తెలంగాణ వస్తుందంటే తాము అందుకు సిద్ధంగా ఉన్నామని కాంగ్రెసు తెలంగాణ ప్రజాప్రతినిధులు అంటున్నారు. తెలంగాణ సకల జనుల సమ్మె నేపథ్యంలో నెలకొన్న పరిస్థితిపై ప్రధానికి రాసిన లేఖలో వారు వివరించారు.

Published On September 28, 2011