బాబు హామీ ఇస్తే మేం ఆలోచిస్తాం: కెటిఆర్ ప్రతి సవాల్

By Srinivas

Published: Thursday, September 29, 2011, 11:30 [IST]

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుకు తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు గురువారం సవాల్ విసిరారు. తెలంగాణ వచ్చే వరకు ఉప ఎన్నికలలో పోటీ చేయవద్దని తెలంగాణ తెలుగుదేశం పార్టీ చేసిన సవాల్‌కు తాము సిద్ధమని అయితే తెలంగాణ రాష్ట్రం వచ్చే వరకు భవిష్యత్తులో తెలంగాణ ప్రాంతంలో ఎక్కడా పోటీ చేయమని చంద్రబాబు హామీ ఇస్తే తాము ఉప ఎన్నికలు బహిష్కరించేందుకు ఆలోచిస్తామని ప్రతి సవాల్ విసిరారు. దీనిపై చంద్రబాబు స్పష్టమైన హామీ ఇస్తే తాము బాన్సువాడ ఉప ఎన్నికల పైనా పునరాలోచిస్తమన్నారు. హైదరాబాదు లేని తెలంగాణ రాష్ట్రం ఎట్టి పరిస్థితుల్లోనూ ఒప్పుకునేది లేదన్నారు. కేంద్ర ప్రభుత్వం సూచించే మధ్యేమార్గాన్ని సైతం ఆమోదించేది లేదన్నారు.

తెలంగాణ తెలుగుదేశం పార్టీ ప్రజాప్రతినిధులు రాజీనామాలు చేసి ఊకదంపుడు ఉపన్యాసాలు ఇవ్వడానికే బాన్సువాడకు బస్సుయాత్రతో బయలుదేరారని విమర్శించారు. త్వరలో తెలంగాణ ఐక్య కార్యాచరణ సమితి ఢిల్లీ వెళ్లనున్నట్లు చెప్పారు. బాన్సువాడలో తాను పోటీ చేయవద్దని తెలంగాణ తెలుగుదేశం పార్టీ చెప్పడం మిలీనియం జోక్ అని తెరాస నుండి పోటీ చేస్తున్నా మాజీ ఎమ్మెల్యే పోచారం శ్రీనివాస్ రెడ్డి అన్నారు. కాగా తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాం అరెస్టును తెరాస చీఫ్ కె చంద్రశేఖర రావు, ఎంపీ విజయశాంతి ఖండించారు. ప్రభుత్వం రెచ్చగొట్టేలా వ్యవహరించ వద్దన్నారు. తర్వాత జరిగే పరిణామాలకు ప్రభుత్వమే బాధ్యత వహించాలన్నారు. ర్యాలీకి మద్దతిస్తేనే అరెస్టు చేస్తారా అని ప్రశ్నించారు.

Published On September 29, 2011