సోనియా అంతర్జాతీయమంటారేమో?: రేవంత్ రెడ్డి

By Srinivas

Published: Thursday, September 29, 2011, 17:31 [IST]

హైదరాబాద్: తెలంగాణపై కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ జాతీయ స్థాయిలో చర్చ అంటే ఏఐసిసి అధ్యక్షురాలు సోనియా గాంధీ అంతర్జాతీయ స్థాయిలో చర్చ అవసరమంటారేమోనని తెలుగుదేశం పార్టీ శాసనసభ్యుడు రేవంత్ రెడ్డి గురువారం ఎద్దేవా చేశారు. తెలంగాణ కోసమే పార్టీ స్థాపించానంటున్న తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు తెలంగాణపై జాప్యం చేస్తున్న కాంగ్రెసు పార్టీని ప్రశ్నించకుండా నిత్యం తెదేపాను లక్ష్యంగా చేసుకోవడం ఏమిటని ప్రశ్నించారు. తెలంగాణ రాజకీయ సంక్షోభంతోనే సాధ్యమని అందుకు బాన్సువాడ ఉప ఎన్నికలకు దూరంగా ఉండాలని తాము కోరుతున్నప్పటికీ కెసిఆర్ ఎందుకు స్పందించడం లేదన్నారు. బాన్సువాడ ఉప ఎన్నికలలో పోచారం శ్రీనివాస్ రెడ్డి గెలిచిన వెంటనే మళ్లీ రాజీనామా చేస్తారా అని ప్రశ్నించారు. తెలంగాణ ప్రజలెవరూ రాయల తెలంగాణ కోరుకోవడం లేదని అన్నారు.

కాగా తాము రాయల తెలంగాణ ఒప్పుకునే ప్రసక్తే లేదని తెలంగాణ రాష్ట్ర సమితి సిద్దిపేట శాసనసభ్యుడు హరీష్ రావు వేరుగా అన్నారు. 1956కు ముందు తెలంగాణే తమకు కావాలన్నారు. హైదరాబాదు లేని తెలంగాణ ఒప్పుకునే ప్రసక్తి లేదన్నారు. తమ రాజీనామాలు కావాలనే తెలుగుదేశం పార్టీ అధినేత నారా చంద్రబాబు నాయుడు, ముఖ్యమంత్రి కిరణ్ కుమార్ రెడ్డి, స్పీకర్ నాదెండ్ల మనోహర్ కలిసి తొక్కి పెడుతున్నారని తెలంగాణ నగారా సమితి చైర్మన్ నాగం జనార్ధన్ రెడ్డి ఆరోపించారు. రాజీనామాలో లాలూచి లేదన్నారు. సమైక్యాంధ్ర కోసమే తమ రాజీనామాలు తొక్కి పెడుతున్నారన్నారు. రాయల తెలంగాణ ఒప్పుకునేది లేదన్నారు.

Published On September 29, 2011