జగన్ ధర్నాకు చుక్కెదురు, లగడపాటి సత్యాగ్రహ విరమణ

By Pratap

Published: Friday, September 30, 2011, 17:56 [IST]

విజయవాడ: వైయస్సార్ కాంగ్రెసు పార్టీ అధ్యక్షుడు వైయస్ జగన్ రైతుల కోసం అక్టోబర్ 1వ తేదీన తలపెట్టిన ధర్నాకు పోలీసులు అనుమతి నిరాకరించారు. ఈ నేపథ్యంలో అదే రోజు తాను తలపెట్టిన సత్యాగ్రహాన్ని విజయవాడ పార్లమెంటు సభ్యుడు విరమించుకున్నారు. రైతు ధర్నా స్థలాన్ని మార్చుకోవాలని వైయస్ జగన్మోహన్ రెడ్డిని గాంధేయ మార్గంలో కోరామని లగడపాటి చెప్పారు. ఇరువురు ఒకే చోట దీక్షలు తలపెట్టడంతో తీవ్ర వివాదం చెలరేగింది. ఈ స్థితిలో జగన్ ధర్నాకు పోలీసులు అనుమతి నిరాకరించినట్లు తెలుస్తోంది.

వైయస్ జగన్ ధర్నాకు అనుమతి నిరాకరించడం పట్ల వైయస్సార్ కాంగ్రెసు పార్టీ నాయకుడు జలీల్ ఖాన్ నిరసన వ్యక్తం చేశారు. జలీల్ ఖాన్‌కు ఫోన్ చేసి జగన్ ధర్నాకు అనుమతి నిరాకరిస్తున్నట్లు విజయవాడ పోలీసు కమిషనర్ చెప్పారు. అధికార పార్టీ నాయకుల కార్యక్రమాలకు పోలీసులు అభ్యంతరం చెప్పడం లేదని, తమ కార్యక్రమాలకే అడ్డు చెబుతున్నారని జలీల్ ఖాన్ అన్నారు. పోలీసులు అనుమతి ఇచ్చినా, ఇవ్వకపోయినా జగన్ దీక్ష సాగుతుందని ఆయన అన్నారు. తమ బాధ్యతగా పోలీసులకు తెలియజేశామని ఆయన అన్నారు. విజయవాడ సబ్ కలెక్టరేట్ వద్ద జగన్ రేపు శనివారం ఉదయం దీక్షను ప్రారంభిస్తారని ఆయన చెప్పారు.

Published On September 30, 2011