గాలి జనార్దన్ రెడ్డి జ్యుడిషియల్ కస్టడీ పొడగింపు

By Pratap

Published: Monday, October 3, 2011, 16:53 [IST]

హైదరాబాద్: కర్ణాటక మాజీ మంత్రి జి. జనార్దన్ రెడ్డి, ఓబుళాపురం మైనింగ్ కంపెనీ (ఒఎంసి) మేనేజింగ్ డైరెక్టర్ బివి శ్రీనివాస రెడ్డి మరింత కాలం హైదరాబాదులోని చంచల్‌గుడా కేంద్ర కార్యాలయంలోనే ఉండాల్సిన పరిస్థితి. వారిద్దరి జ్యుడిషియల్ కస్టడీని నాంపల్లి కోర్టు ఈ నెల 17వ తేదీ వరకు పొడగించింది. సోమవారంతో వారిద్దరి జ్యుడిషియల్ కస్టడీ ముగిసింది. దీంతో సిబిఐ వారి జ్యుడిషియల్ కస్టడీని పొడగించాలని కోరుతూ మెమో దాఖలు చేసింది.

కోర్టుకు, జైలుకు మధ్య వీడియో అనుసంధానం చేసి న్యాయమూర్తి విచారణ జరిపింది. భద్రతా కారణాల వల్ల నిందితులను కోర్టుకు తీసుకుని రాలేకపోయామని సిబిఐ అధికారులు చెప్పారు. గాలి జనార్దన్ రెడ్డి, శ్రీనివాస రెడ్డి దాఖలు చేసుకున్న బెయిల్ పిటిషన్లను కోర్టు సెప్టెంబర్ 30వ తేదీన తిరస్కరించింది. గనుల అక్రమ తవ్వకాలపై సిబిఐ వారిద్దరిని సెప్టెంబర్ 5వ తేదీన అరెస్టు చేసింది.

Published On October 3, 2011