తెలంగాణపై రాజీనామాలు, పార్టీతోనూ తెగదెంపులు

By Pratap

Published: Monday, October 3, 2011, 9:21 [IST]

హైదరాబాద్: ఢిల్లీలో మకాం వేసి, అధిష్టానం పెద్దలను కలిసినా ఏ మాత్రం ఫలితం లభించకపోవడంతో కాంగ్రెసు తెలంగాణ ప్రజా ప్రతినిధులు తీవ్ర నిరాశకు గురైనట్లు తెలుస్తోంది. తమ పార్టీ ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ నివేదిక సమర్పించినప్పటికీ తెలంగాణపై అధిష్టానం తేల్చే పరిస్థితి లేకపోవడంతో భవిష్యత్తు కార్యాచరణపై వారు తర్జనభర్జనలు పడుతున్నారు. మొదట మంత్రి పదవులకు, శాసనసభా సభ్యత్వాలకు రాజీనామా చేయాలని తెలంగాణకు చెందిన మంత్రులు, శాసనసభ్యులు భావిస్తున్నట్లు సమాచారం. అయితే, వారు సోమవారం ప్రధాని డాక్టర్ మన్మోహన్ సింగ్‌ను కలిసే అవకాశం ఉంది. ప్రధాని స్పందనను బట్టి వారు భవిష్యత్తు కార్యాచరణపై నిర్ణయం తీసుకోవాలని అనుకుంటున్నట్లు తెలుస్తోంది.

తొలుత పదవులకు రాజీనామా చేసి, అప్పటికీ పార్టీ అధిష్టానం కదలిరాకుంటే పార్టీకి కూడా రాజీనామా చేయాలని భావిస్తున్నట్లు తెలుస్తోంది. నల్లగొండ జిల్లాకు చెందిన కోమటిరెడ్డి వెంకటరెడ్డి రాజీనామా చేసి ప్రజల్లోకి వెళ్తుండడంతో తాము కూడా అదే బాట పట్టాలని అనుకుంటున్నట్లు సమాచారం. తొలుత స్టీరింగ్ కమిటీకి నాయకత్వం వహిస్తున్న జానా రెడ్డి మంత్రి పదవికి, శాసనసభా సభ్యత్వానికి రాజీనామా చేస్తారని అంటున్నారు. ఆ తర్వాత వరుసగా మంత్రులు, శాసనసభ్యులు రాజీనామా చేయాలని భావిస్తున్నారు. కోమటిరెడ్డి వెంకటరెడ్డికి ముందు జూపల్లి కృష్ణా రావు మంత్రి పదవికి రాజీనామా చేశారు.

Published On October 3, 2011