గాలి అనుచరుడు జయన్న ఇంట్లో సిబిఐ సోదాలు

By Srinivas

Published: Tuesday, October 4, 2011, 12:03 [IST]

బెంగళూరు: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డికి చెందిన మైనింగ్ అక్రమాల కేసులో సిబిఐ తన సోదాలు మంగళవారం కూడా కొనసాగిస్తోంది. మంగళవారం ఉదయమే సిబిఐ అధికారులు బృందాలుగా విడిపోయి పలు చోట్ల తనిఖీలు చేశారు. ప్రముఖ గనుల యజమాని శాంతలక్ష్మీ జయరాం ఇళ్లు, కార్యాలయంలో, జిందాల్ సౌత్ వెస్ట్, గ్లాస్ హవుస్ తదితర కంపెనీల కార్యాలయాలతో పాటు కర్నాటక ఎమ్మెల్యే నాగేంద్రకు చెందిన ఈని ట్రేడర్స్ కార్యాలయంలోనూ సోదాలు కొనసాగిస్తోంది.

అలాగే గాలి జనార్ధన్ రెడ్డి ప్రముఖ అనుచరుడు జయన్న ఇంట్లో సిబిఐ సోదాలు చేసింది. సిబిఐ బృందాలు ఆయా కార్యాలయాలు, ఇళ్ల నుండి ముఖ్యమైన పత్రాలు స్వాధీనం చేసుకున్నట్లుగా తెలుస్తోంది. ఎమ్మెల్యే నాగేంద్రతో పాటు మరో నాలుగు మైనింగ్ కంపెనీల పైనా సిబిఐ అధికారులు ఐదు బృందాలుగా విడిపోయి సోమవారమే సోదాలు నిర్వహించిన విషయం తెలిసిందే. గాలి జనార్ధన్ రెడ్డికి ఆయన అనుచరుల పేరుతో బినామీ ఆస్తులు సిబిఐ భావిస్తున్నందు వల్లే సోదాలు కొనసాగిస్తున్నట్లుగా తెలుస్తోంది.

Published On October 4, 2011