సిఎంను వెనుకేసుకోస్తూనే విమర్శించిన శంకర రావు

By Srinivas

Published: Tuesday, October 4, 2011, 15:00 [IST]

హైదరాబాద్: విద్యుత్ కోత విషయంలో ముఖ్యమంత్రి కిరణ్ కుమార్ రెడ్డికి మంత్రి శంకర రావు ఓ వైపు మద్దతిస్తూనే మరోవైపు ఆయనపై విమర్శలు చేశారు. తెలంగాణలో విద్యుత్ కోతలో ముఖ్యమంత్రి కిరణ్ కుమార్ రెడ్డి కుట్ర ఉందని చెప్పడం సరికాదని అందులో ఆయన కుట్ర ఏదీ లేదని చేనేత, జౌళీ శాఖ మంత్రి శంకర రావు మంగళవారం అన్నారు. విద్యుత్ కోత, ఆందోళనల అంశాలలో ముఖ్యమంత్రిపై ఆరోపణలు చేయడం సరికాదన్నారు. తెలంగాణ రాష్ట్ర సమితి ఆరోపణలు ఈ శతాబ్దపు జోక్ అన్నారు. ఉద్యమానికి చెడ్డపేరు తెచ్చే ఆందోళనకు సరికాదన్నారు. ఉద్యమం ఏ ఒక్కరి సొత్తు కాదన్నారు. బస్సులు, ఇతర ప్రాంతాల ప్రజలపై దాడులు చేయడం సరికాదన్నారు. సకల జనుల సమ్మె ఆపేస్తే బావుంటుందని ఆయన అభిప్రాయపడ్డారు.

ముఖ్యమంత్రితో మాట్లాడుతామనుకుంటే ఆయన తనకు అపాయింటుమెంట్ ఇవ్వడం లేదని ఆరోపించారు. తనను బర్తరఫ్ చేస్తానంటే తాను స్వాగతిస్తానని చెప్పారు. హోంమంత్రి సబితా ఇంద్రారెడ్డిపై తాను చేసిన ఆరోపణలకు ఆధారాలను గడవులోగా కోర్టుకు సమర్పిస్తానని చెప్పారు. అధిష్టానానికి తనపై నమ్మకం ఉంది కాబట్టే మంత్రిగా ఉన్నానన్నారు. ఇప్పటికైనా వారికి నమ్మకముంటేనే మంత్రిగా కొనసాగుతానని చెప్పారు. కాగా సమాచార హక్కు చట్టం కింద ఆయన ఎమ్మెల్యేల ఆస్తుల వివరాలను కోరారు.

Published On October 4, 2011